नेष्डो समृद्ध लघुवित्तका लगानीकर्ताले एकैदिन ६०२ रुपैयाँले गुमाए, सेयरमूल्य २७१० रुपैयाँमा झर्‍याे

नेष्डो समृद्ध लघुवित्त वित्तीय संस्था लिमिटेडको प्रारम्भिक सार्वजनिक निष्काशन (आईपीओ) मा लगानी गरेका लगानीकर्ताको सम्पत्ति बुधबार एकैदिन प्रतिकित्ता ६०२ रुपैयाँले घटेको छ ।

मंगलबार प्रतिकित्ता ३ हजार ११ रुपैयाँमा बन्द भएको कम्पनीको सेयर १० प्रतिशतले बढेर बुधबार अधिकतम ३ हजार ३१२ रुपैयाँसम्म पुगेको थियो । त्यसपछि लघुवित्तको सेयर घट्न थालेको छ । लगातार १६ दिनसम्म बढेको लघुवित्तको सेयरमूल्य बुधबार सकारात्मक सर्किट लागेर पुनः नकारात्मक सर्किट लागेर घटेको हो । यसअनुसार लघुवित्तको सेयरमूल्य एकैदिन २० प्रतिशतसम्म घटेको हो ।

अघिल्ला दिनहरुमा बिक्री आदेश नदेखिएको लघुवित्तको सेयरमूल्य १० मंगलबार बन्द भएको मूल्यमा नै १० प्रतिशतले घटेपछि आईपीओमा सेयर पाएकाहरु बिक्री गर्न लामबद्ध भएका छन् । सेयरमूल्य घटेपछि नेप्सेको मार्केट डेप्थमा नकारात्मक सर्किट मूल्यमा नै ९१९ वटा आदेश मार्फत ९ हजार २०० कित्ताको बिक्री आदेश रहेको छ । 

बुधबार ३ हजार ३१२ रुपैयाँ पुगेको लघुवित्तको सेयरमूल्य अधिकतम बिन्दुबाट २० प्रतिशतसम्म घटेपछि २ हजार ७१० रुपैयाँमा झरेको छ । मंगलबार कम्पनीको सबैभन्दा धेरै ३ हजार ८७१ कित्ता सेयर १ करोड १६ लाख ५१ हजार ७६२ रुपैयाँमा खरीद बिक्री भएको थियो ।

त्यसअघिका २ दिन सोमबार र मंगलबार १ हजार बढी कित्ता सेयर कारोबार भएपनि सो अघिका दिनहरुमा १ हजारभन्दा कम कित्ता मात्र कारोबारमा आएको थियो ।

बुधबार उच्च मूल्यमा आईपीओ बेच्नेले ३२ गुणा बढी नाफा आर्जन सफल भएपनि ६०२ रुपैयाँले घटेपछि भने लगानीकर्ताको थप नाफा आर्जन गर्ने आशामा तुषारापात भएको छ । बजार वियरिस ट्रेण्डमा रहेकाले सेयर संख्याका हिसाबले ३ हजार कित्ता कारोबार भएको भोलिपल्ट नै सेयरमूल्य घटेपछि लघुवित्तको उच्च संख्यामा सेयर खरीद बिक्री भएको छ । सोढ २ बजेसम्म लघुवित्तको ५० हजार कित्ता बढी सेयर खरीद बिक्री भैसकेको छ ।

धितोपत्र निष्काशन तथा बाँडफाँड निर्देशिका बमोजिम गोलाप्रथाबाट लघुवित्तको एक हजार रुपैयाँ बराबरको १० कित्ता सेयर हात पारेका लगानीकर्ताको लगानी ३३ गुणा बढीसम्म अर्थात ३३ हजार ३१२ रुपैयाँसम्म पुगेको हो ।

लघुवित्तको सेयर चैत १४ गतेदखि धितोपत्र दोस्रो बजारमा कारोबारमा सुरु भएको थियो । कारोबारमा आएदेखि नै लघुवित्तको सेयर खरीद माग उच्च हुँदा सेयरमूल्य निरन्तर उकालो लागिरहेकोमा बैशाख ७ गतेबाट घट्न सुरु भएको हाे ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।