पोखरा महानगरको ७५० युवालाई स्वरोजगार बनाउने लक्ष्य

पोखरा महानगरपालिकाले पोखराका ७५० युवालाई स्वरोजगार बनाउने लक्ष्य राखेको छ ।

महानगरपालिकाले चालू आर्थिक वर्षको बजेट कार्यक्रम मार्फत युवाहरूलाई लक्षित गरेर युवा तथा साना व्यवसायी स्वरोजगार कोष सञ्चालन गरेर युवालाई स्वरोजगार बनाउने भएको हो ।

कोषमा महानगरले ५ करोड रुपैयाँ विनियोजन गरेको छ । युवा स्वरोजगार कोष र मुक्तिनाथ विकास बैंकको तर्फबाट समेत ५-५ करोड गरी १० करोड थप गरी कुल १५ करोड रुपैयाँको कोषमार्फत कार्यक्रम सञ्चालन हुनेछ ।

पोखरा महानगरका प्रमुख धनराज आचार्यले कोष सञ्चालन गर्न त्रिपक्षीय सम्झौताका लागि सैद्धान्तिक सहमति जुटिसकेको छ । युवा स्वरोजगार कोषका कार्यकारी निर्देशक विश्वमोहन अधिकारी, मुक्तिनाथ विकास बैंकका प्रमुख कार्यकारी अधिकृत प्रद्युम्न पोखरेल र महानगरका प्रमुख आचार्यबीच कोषमार्फत कार्यक्रम छिट्टै आगडि बढाउने सैद्धान्तिक सहमति भएको बताइन्छ ।

कोषमार्फत कृषि क्षेत्रमा लागेका युवा उद्यमीलाई प्राथमिकता दिइने र लगानी गरिनेछ । कृषि उद्यमको माध्यमबाट रोजगारीसमेत अभिवृद्धि हुने विश्वास लिइएको छ । आगामी ४ वर्षसम्मका लागि अगाडि बढाइने कार्यक्रम सम्झौता भएर कार्यान्वयनमा जान कम्तीमा १ महिना लाग्नेछ ।

महानगर प्रमुख आचार्यले भने, “हालै युवा स्वरोजगार कोषका कार्यकारी निर्देशक र मुक्तिनाथ विकास बैंकका प्रमुख कार्यकारी अधिकृतसँग बसेर कृषि उद्यमलक्षित गर्दै स्वरोजगार कोषमार्फत युवाहरूलाई प्रोत्साहन गर्ने सम्बन्धमा हाम्रो सहमति भएको छ । यसमा हामी तीनवटै पक्षले बराबर रकम जग्मा गर्ने छौँ र बैंक मार्फत नै यसलाई अगाडि बढाउने योजनामा छौँ । खासगरी कृषि क्षेत्रमा केही गर्न चाहने युवालाई लक्षित गरेर महानगरमा रोजगार अभिवृद्धि गर्ने पनि हाम्रो चाहना हो ।”

निर्देशक अधिकारीले अगामी चार वर्षसम्म यो कार्यक्रमलाई अगाडि बढाउने उद्देश्यका साथ आफूहरु अगाडि बढेको बताए । उनले भने, “यो कार्यक्रममार्फत न्यून वर्ग र बेरोजगार युवालाई समेट्ने योजना छ । कोष अगाडि बढाउनका लागि अब औपचारिक सम्झौता गर्ने तयारीमा छौँ ।” उनका अनुसार यो कार्यक्रम सम्झौता भएर कार्यान्वयनमा जान कम्तीमा एक महिना लाग्ने छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।