फर्स्ट माइक्रोफाइनान्सले ८८ प्रतिशतले बढायो नाफा

फर्स्ट माइक्रोफाइनान्स लघुवित्त वित्तीय संस्था लिमिटेडले गत आर्थिक वर्ष २०७८।७९ को चौथो त्रैमाससम्म अघिल्लो आर्थिक वर्षको सोही अवधिको तुलनामा ८७.८२ प्रतिशतले खुद नाफा वृद्धि गरेको छ ।

असार मसान्तसम्म कम्पनीले २६ करोड ८८ लाख ८३ हजार रुपैयाँ खुद नाफा आर्जन गरेको छ । अघिल्लो आर्थिक वर्षको सोही अवधिसम्ममा लघुवित्तले १४ करोड ३१ लाख ६२ हजार रुपैयाँ खुद नाफा कमाएको थियो ।

असार मसान्तसम्म लघुवित्तको वितरणयोग्य नाफा २० करोड ९५ लाख ६९ हजार रहेको छ । यसबाट लघुवित्तले सेयरधनीलाई २१.७३ प्रतिशत लाभांश वितरण गर्ने क्षमता राख्दछ ।

समीक्षा अवधिमा लघुवित्तको चुक्ता पूँजी १० प्रतिशत, जगेडा कोष ६६.२५ प्रतिशत, सापटी ९.८३ प्रतिशत र कर्जा लगानी २७.२२ प्रतिशत बढेको छ । यसैगरी समीक्षा अवधिमा लघुवित्तको खुद ब्याज आम्दानी ६०.८४ प्रतिशत, सञ्चालन मुनाफा ९०.७२ प्रतिशत बढेको छ ।

अपरिष्कृत वित्तीय विवरण अनुसार फर्स्टले ९ अर्ब ४५ करोड ७६ लाख रुपैयाँ बैंक तथा वित्तीय संस्थाहरुसँग सापटी लिएर अन्य लघुवित्त कम्पनीहरुलाई १० अर्ब ४० करोड ६० लाख रुपैयाँ कर्जा लगानी गरेको छ । यसबाट लघुवित्तले ४२ करोड ७२ लाख ९५ हजार रुपैयाँ खुद ब्याज आम्दानी गरेको छ । लघुवित्तको सञ्चालन नाफा ३८ करोड ८४ लाख ६४ हजार रुपैयाँ रहेको छ ।

चुक्ता पुँजी ९६ करोड ४४ लाख ९२ हजार रुपैयाँ रहेको फर्स्ट माइक्रोफाइनान्सको प्रतिसेयर आम्दानी ११.५५ रुपैयाँ बढेर २७.८८ रुपैयाँ पुगेको छ । लघुवित्तले जगेडा कोषमा ४४ करोड ६ लाख ८६ हजार रुपैयाँ सञ्चित गरेको छ । सो अवधिसम्ममा लघुवित्तको प्रतिसेयर नेटवर्थ १४५.६९ रुपैयाँ, मूल्य आम्दानी अनुपात २३.२८ गुणा छ ।

समीक्षा अवधिमा लघुवित्तको खराब कर्जा अनुपात शुन्य छ भने निक्षेप संकलन लागत ११.३८ प्रतिशत, आधारदर १२.९९ प्रतिशत र स्प्रेडदर २.६२ प्रतिशत मात्र रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।