ब्रोकर नम्बर ५७ ले पायो धितोपत्र बोर्डबाट दुई स्थानमा शाखा विस्तार अनुमति

ब्रोकर नम्बर ५७, आर्यतारा इन्भेष्टमेन्ट इन्भेष्टमेन्ट एण्ड सेक्यूरिटीज प्रालिले नेपाल धितोपत्र बोर्डबाट दुई स्थानमा शाखा विस्तारका लागि अनुमति पाएको छ ।

बोर्डले साउन ३१ गते उक्त ब्रोकरलाई रुपन्देही जिल्लाको भैरहवा र पाल्पा जिल्लाको तानसेनमा शाखा कार्यालय खोल्न अनुमति प्रदान गरेको हो । धितोपत्र व्यवसायी (धितोपत्र दलाल तथा धितोपत्र व्यापारी) नियमावली २०६४ को नियम ४० को उपनियम (१) को व्यवस्था बमोजिम उक्त स्वीकृति प्रदान गरिएको बोर्डले जनाएको छ ।

बोर्डले पहिलो चरणमा ७ स्थानमा र दोस्रो चरणमा ११ स्थानमा गरी उपत्यका बाहिर विभिन्न स्थानमा शाखा कार्यालय सञ्चालनको अन्तिम स्वीकृति दिएको छ ।

नियमावली अनुसार शाखा कार्यालय सञ्चालनको अन्तिम स्वीकृति पाएका ब्रोकरहरुले शाखा कार्यालयल सञ्चालनको अन्तिम स्वीकृति लिन अघि नै आफ्नो सम्पुर्ण पुर्वाधार तयार गरिसक्नुपर्छ । जसमा कम्तिमा ५ सय वर्गफिटमा शाखा कार्यालय स्थापना गरी वाणिज्यशास्त्र, अर्थशास्त्र, व्यवस्थापन, कानुन विषयमा स्नातक वा चार्टर्ड काउन्टेन्सी गरेको व्यक्तिलाई प्रमुख र परिपालन तथा सुचना प्रविधि सहित कम्तीमा ३ जना कर्मचारी नियुक्त गरेको हुनुपर्छ । यस्तै शाखा कार्यालयमा कम्तीमा २ थान कम्युटर र त्यसका लागि अन्य ब्याकअप पावर सहितको पुर्वाधार तयार पार्नुपर्ने व्यवस्था छ । 

उक्त ब्रोकर कम्पनीले धितोपत्र दलाल व्यवसायीको शाखा कार्यालय सञ्चालन लागि केही समयअघि बोर्डमा निवेदन पेश गरेको थियो । आर्यतारा इन्भेष्टमेन्ट इन्भेष्टमेन्ट एण्ड सेक्यूरिटीज प्रालिले नेप्सेसँगकाे समन्वयपछि छिट्टै दुबै स्थानबाट सेयर खरिद बिक्रीकाे सेवा दिन थाल्ने बताएकाे छ ।

उक्त शाखा कार्यालयहरुबाट धितोपत्र खरिद बिक्री (कारोबार) कार्य सञ्चालन गर्ने सम्बन्धमा नेपाल स्टक एक्सचेन्ज लिमिटेड (नेप्से) सँग आवश्यक समन्वय गरी सञ्चालन गर्नुपर्नेछ ।

समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।