नाफा सुरक्षित गर्ने होडले नेप्सेमा दोहोरो अंकको गिरावट, कारोबार रकमले पनि साथ छाड्यो

सेयर बजारमैत्री अर्थमन्त्रीको रुपमा नेकपा एमालेका उपाध्यक्ष विष्णुप्रसाद पौडेलले कार्यभार सम्हालेपछि पछिल्लो दुई दिनमा बढेको सेयर बजारबाट मंगलबार नाफा सुरक्षित गर्ने होडले नेप्से दोहोरो अंकले घटेको छ ।

सोमबार र मंगलबार गरी दुई दिनमा नेप्से ११७ अंकले बढेको थियो । अल्पकालीन लगानीकर्ताहरुले मंगलबार प्रोफिट बुकिङ्ग गर्दा बजार सूचक नेप्से ११.८१ अंकले घटेको हो । गिरावटसँगै नेप्से १९७२.१५ बिन्दुमा झरेको छ । यस्तै ठूला कम्पनीहरुको सूचक मापक सेन्सेटिभ इण्डेक्स पनि बुधबार ४.७२ अंकले घटेर ३८१.३२ बिन्दुमा झरेको छ ।

नेप्सेसँगै अघिल्लो दिनको तुलनामा कारोबार रकम १ अर्ब ७३ करोड ९ लाख रुपैयाँले घटेको छ । अघिल्लो कारोबार दिन २ अर्ब ८८ करोड ४४लाख रुपैयाँको सेयर खरिदबिक्री भएको थियो । बुधबारको बजारमा भने २५७ कम्पनीका ६५ लाख ३० हजार ४१५ कित्ता सेयर ३९ हजार ६६० पटकको कारोबारबाट २ अर्ब १५ करोड ३५ लाख ४७ हजार २१० रुपैयाँमा खरिदबिक्री भएका छन् ।

बजार घटेपनि बुधबारको बजारमा आधा दर्जन कम्पनीको सेयरमूल्य १० प्रतिशतले बढेर सकारात्मक सर्किट लागेको छ । आजको बजारमा रोक्का रहेर आजै कारोबार खुलेका सेन्ट्रल फाइनान्स र प्रभु लाइफ इन्स्योरेन्स सहित अन्य चार कम्पनीहरु धौलागिरी लघुवित्त, खप्तड लघुवित्त, श्रृजनशील लघुवित्त र विन नेपाल लघुवित्तको सेयरमूल्यमा सकारात्मक सर्किट लागेको हो ।

सर्किटपछि सेन्ट्रल फाइनान्सको सेयरमूल्य ३२२.३० रुपैयाँ, प्रभु लाइफ इन्स्योरेन्सको ३९२.७० रुपैयाँ, धौलागिरी लघुवित्तको ९५०.७०, खप्तड लघुवित्तको ८३८.८० रुपैयाँ, श्रृजनशील लघुवित्तको १६०४.७० रुपैयाँ र विन नेपाल लघुवित्तको १०३८ रुपैयाँ पुगेको छ । यस्तै तेह्रथु पावर, सिटिजन म्युचुअल फन्ड–१, साहस उर्जा लिमिटेड र अपर तामाकोशी हाइड्रोपावर कम्पनीको सेयरमूल्य ५ प्रतिशतभन्दा धेरैले बढेको छ ।

उता बुधबारको कारोबारमा महुली लघुवित्तको सेयरमूल्य सर्वाधिक ५.२० प्रतिशत घटेर १०२० रुपैयाँमा झरेको छ । त्यसैगरी, अजोड इन्स्योरेन्सको सेयरमूल्य ४.०६, सामुदायिक लघुवित्त ३.९३ प्रतिशत, नाडेप लघुवित्त ३.६५ प्रतिशत र ओरियन्टल होटल ३.६४ प्रतिशतले सेयरमूल्य घटेको छ । घलेम्दी हाइड्रोपावर, माउन्टेन इनर्जी, बरुण हाइड्रोपावर, न्यादी हाइड्रोपावर र चन्द्रागिरि हिल्स लिमिटेडका लगानीकर्ताले ३ प्रतिशतभन्दा धेरैले गुमाएका छन् ।

आज नबिल बैंकको सर्वाधिक कारोबार भएको छ । बैंकको ८ करोड ८५ लाख रुपैयाँ बराबरको सेयर खरिद बिक्री भएको छ । रिडी पावर कम्पनीको ८ करोड ५ लाख, अपर तामाकोशी ७ करोड ८४ लाख, हिमालयन डिष्टिलरीको ७ करोड २४ लाख र प्राइम कमर्सियल बैंकको ५ करोड ९७ लाख रुपैयाँ भन्दा बढीको सेयर किनबेच भएको छ ।

आज कारोबारमा आएका १३ उपसमूहगत सूचकमध्ये ५ बढेको छ भने ८ वटा घटेको छ । यस दिन होटल तथा पर्यटन सर्वाधिक २.१९ प्रतिशत घट्दा लघुवित्त, लगानी, बैंकिङ्ग, ब्यापार, विकास बैंक, , उत्पादन तथा प्रशोधनमुलक र अन्यको इन्डेक्स ऋणात्मक बनेको छ । हाइड्रोपावर, फाइनान्स, निर्जीवन बीमा, जीवन बीमा र म्युचुअल फन्डको सूचक भने बढेको छ । हाइड्रोपावरको सूचक सर्वाधिक ०.७१ प्रतिशतले बढेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।