रिलायन्स स्पिनिङको खस्कँदो वित्तीय अवस्था, उच्च घट्यो मुनाफा

असार २७ देखि वैदेशिक रोजगारीमा रहेका नेपाली कामदारलाई आईपीओ निष्कासन गर्न लागेको गोल्यान समुहको लगानी रहेको रिलायन्स स्पिनिङ मिल्स लिमिटेडको खराब वित्तीय अवस्था देखिएको छ ।

चालु आर्थिक वर्षको तेस्रो त्रैमासिक प्रतिवेदन अनुसार कम्पनीको खुद मुनाफामा भारी गिरावट आएको हो । विसं २०८० चैत मसान्तसम्म कम्पनीले २ करोड ६३ लाख २३ हजार रुपैयाँ मात्र खुद नाफा आर्जन गरेको छ । जबकी गत आवमा कम्पनीको मुनाफा ९२ करोड ७८ लाख २१ हजार रुपैयाँ रहेको थियो । गत आवको तथ्याङ्कलाई आधार मान्दा कम्पनीको गत आवको ९ महिनाको औसत मुनाफा ६९ करोड ५८ लाख ६५ हजार हुन आउँछ । व्यापारमा गिरावट आउँदा त्यसको सोझो असर खुद नाफामा परेको हो ।

चालु आर्थिक वर्षको तेस्रो त्रैमासको वित्तीय विवरणमा कम्पनीको बिक्री आय ७ अर्ब २१ लाख छ । गत आर्थिक वर्षको १२ महिनामा रिलायन्स स्पिनिङ मिल्सले १० अर्ब ५८ लाख बढीको मालबवस्तु बिक्री गरेको थियाे । गत आवको तथ्याङ्कलाई आधार मान्दा कम्पनीको गत आवको ९ महिनाको औसत बिक्री ७ अर्ब ५० करोड ४३ लाख ५६ हजार रुपैयाँ हुन आउँछ । यस्तै गत आवमा ३ अर्ब ७४ करोड ७९ लाख रुपैयाँ रहेकाे कम्पनीको अन्य आय पनि चालु आवको ९ महीना अवधिमा २ करोड १४ लाख ७६ हजार रुपैयाँ छ ।

गत अवको ९ महीनामा १९ करोड १५ लाख धेरै खर्च सामान बिक्रीमा गरेकोमा चालु आवको सोही अवधिमा ८ करोड ६७ लाख मात्र रहेको छ । जुन गत आवको तुलनामा ५४.६९% कम हो । समीक्षा अवधिमा गत आवमा वित्तीय खर्च २४ करोड ९० लाखबाट ४९.९६% बढेर चालु आवको ९ महीना अवधिमा नै ३७ करोड ३३ लाख ९८ हजार रुपैयाँ पुगेको छ ।

आइपीओ निष्काशनको अन्तिम तयारीमा रहेको कम्पनीको खराब वित्तीय प्रदर्शनले बुक बिल्डिङ्गबाट महङ्गो मूल्यमा सेयर बिक्री गर्न लागेको कम्पनीको उक्त सार्वजनिक निष्कासनमा धक्का लाग्नसक्ने देखिएको हो ।

चुक्ता पुँजी १ अर्ब ७० करोड ७३ लाख ४० हजार रुपैयाँ रहेको रिलायन्स स्पिनिङ मिल्सको आम्दानी र मुनाफामा आएको उच्च गिरावटले कम्पनीको वार्षिक प्रतिसेयर आम्दानीमा पनि उच्च गिरावट देखिएको छ । गत आवमा वार्षिक प्रतिसेयर आम्दानी ५४ रुपैयाँ ३४ पैसा रहेको थियाे । उक्त कम्पनीको इपीएस गत चैत मसान्तसम्म २ रुपैयाँ ८ पैसा कायम भएको छ ।

कम्पनीको सेयरधनीलाई वितरण गर्ने कोष (अन्य इक्विटी) मा ५ अर्ब ३२ करोड १६ लाख रुपैयाँ सञ्चित छ । गत आवमा अन्य इक्विटीमा ५ अर्ब ६३ करोड ६७ लाख थियो । एक वर्षमा अन्य इक्वीटी ३१ करोड ५१ लाख ४५ हजार रुपैयाँ बढीले घटेको छ ।

गत चैतसम्म कम्पनीको प्रतिसेयर नेटवर्थ ४११ रुपैयाँ ६९ पैसा कायम भएको छ । गत आवमा कम्पनीको प्रतिसेयर नेटवर्थ ४३० रुपैयाँ १५ पैसा थियो । कम्पनीले हाल कायम गरेको नेटवर्थ बुक बिल्डिङ्गबाट जारी गर्न लागेको सेयर मूल्यभन्दा आधा कम हो । रिलायन्स स्पिनिङ मिल्सले प्रतिकित्ता ८२० रुपैयाँ ८० पैसामा आईपीओ बिक्रीमा ल्याउँदैछ । कम्पनीले १ लाख १५ हजार ५९६ कित्ता सेयर असार २७ गतेदेखि वैदेशिक रोजगारीमा रहेका नेपालीहरुका लागि जारी गर्दैछ ।

*कम्पनीले प्रकाशन गरेको वित्तीय विववरण अनुसार विश्लेषण हुँदा गत आवको पूर्ण आर्थिक वर्षको तथ्याङ्क र चालु आर्थिक वर्षको ९ महीनाको तथ्याङ्कलाई तुलनात्मक रुपमा विश्लेषण हुन पुगेकोले यसअघि प्रकाशित समाचारलाई संशाेधन गरिएकाे छ। चालु आवको तेस्रो त्रैमाससम्मको तथ्याङ्क सहि भएपनि गत आवको १२ महिनाको तथ्याङ्कलाई ९ महिना मानेर तुलनात्मक विश्लेषण हुँदा कम्पनीको खुद नाफा र आम्दानीको प्रतिशतमा फरक पर्न गएको हो । मानवीय कमजाेरीका कारणबाट समाचारबाट पाठकमा संप्रेषण हुन गएको गलत सन्देशप्रति क्षमायाचना गर्दछौं ।-सम्पादक

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।