सप्तकोशी सिमेन्टको आइपिओ निष्काशन तथा बिक्रि प्रवन्धकमा सिद्धार्थ क्यापिटल

काठमाडौँ । ‘पूर्वको गौरव’ भनी परिचित सप्तकोशी सिमेन्ट लिमिटेडले सार्वजनिक प्राथमिक सेयर (आइपीओ) निष्कासन गर्ने तयारी गरेको छ। यसका लागि कम्पनीले सिद्धार्थ क्यापिटल लिमिटेडलाई निष्कासन तथा बिक्री प्रवन्धकको रुपमा नियुक्त गरेको छ।

कम्पनीले १०० रुपैयाँ दरका चुक्ता पुँजीको २० प्रतिशत सेयर सर्वसाधारणमा निष्कासन गर्ने योजना बनाएको छ । सम्झौतापत्रमा सप्तकोशी सिमेन्ट लिमिटेडका तर्फबाट अध्यक्ष मोना जालान र सिद्धार्थ केपिटल लिमिटेडका तर्फबाट प्रमुख कार्यकारी अधिकृत सन्दिप कार्कीले हस्ताक्षर गरेका छन् ।

सप्तकोशी सिमेन्ट उच्च स्तरीय सिमेन्ट उत्पादक कम्पनी हो । जसको दैनिक उत्पादन क्षमता ६०० टन रहेको छ । कम्पनीले नेपाल गुणस्तरको निर्धारित मापदण्ड अनुसार पीपीसी ४३ र ५३ ग्रेडको ओपीसी सिमेन्ट उत्पादन गर्दै आएको छ। नेपाल सिमेन्ट बजारमा अग्रणी भुमिका निर्वाह गर्दै आएको यस कम्पनीले सन् २०१९ देखि निरन्तर संचालन नाफा कायम राख्न सफल भएको छ।

पूर्वी नेपालमा करिब २० प्रतिशत बजार हिस्सा ओगटेको कम्पनीले अन्य क्षेत्रीय प्रतिस्पर्धीहरुसँग उत्कृष्ट प्रदर्शन गर्दै आएको छ । आर्थिक वर्ष २०८१÷८२ मा कम्पनीले गत वर्षको तुलनामा २७ प्रतिशत बढी विक्री लक्ष्य हासिल गरेको छ । साथै, आव २०८१/८२ को नाफाबाट कम्पनीले १२ प्रतिशत बोनस शेयर पनि जारी गरेको छ ।