याङ्गो डेलिभरी सेवा काठमाडौँमा सुरु

काठमाडौँ । विश्वव्यापी प्रविधि कम्पनी याङ्गो ग्रुपले नेपाली बजारमा आफ्ना सेवाहरू विस्तार गर्दै याङ्गो एपमार्फत एक्सप्रेस तथा कार्गो डेलिभरी समाधान ‘याङ्गो डेलिभरी’ सेवा सुरु गरेको छ। यस सेवाले काठमाडौँभित्र पार्सल ढुवानीका लागि व्यक्ति–व्यक्ति तथा साना तथा मध्यम व्यवसायहरूलाई लक्षित गरी लचिलो, सहज र प्रभावकारी समाधान प्रदान गर्ने जनाएको छ। अब याङ्गो एपमार्फत राइड–हेलिङसँगै डेलिभरी सेवा पनि एउटै प्लेटफर्मबाट उपलब्ध हुने भएको छ।

सेवा सुरु भएसँगै काठमाडौँका प्रयोगकर्ताहरूले मोटो, कार तथा कार्गो गरी तीन प्रकारका डेलिभरी विकल्प प्रयोग गर्न सक्नेछन्। मोटो कुरियर साना प्याकेज र कागजातका लागि उपयुक्त रहेको छ भने कार कुरियर मध्यम आकारका सामान ढुवानीका लागि लक्षित छ। त्यस्तै, नयाँ रूपमा थपिएको कार्गो विकल्पमार्फत ठूला तथा भारी सामानहरू पनि काठमाडौँभित्र सहज रूपमा ढुवानी गर्न सकिनेछ।

शहरी जीवनशैली र साना व्यवसायहरूमा छिटो, सजिलो र भरपर्दो ढुवानीको आवश्यकता बढ्दै गएको सन्दर्भमा, याङ्गो डेलिभरीले व्यक्ति–व्यक्ति ढुवानी गर्ने प्रयोगकर्ता र साना तथा मध्यम व्यवसायहरूलाई शहरभरि सामान सार्न सहज बनाउने विश्वास लिइएको छ। याङ्गो डेलिभरीका दक्षिण एशियाका क्षेत्रीय प्रमुख मोहम्मद अहसान अकबरका अनुसार काठमाडौँमा सामान पठाउने र प्राप्त गर्ने प्रक्रियालाई सरल बनाउने उद्देश्यका साथ प्रयोगकर्ताहरूलाई आवश्यकता अनुसार विभिन्न डेलिभरी विकल्प उपलब्ध गराइएको हो।

यो डेलिभरी सेवा दैनिक प्रयोगका विविध अवस्थालाई ध्यानमा राखेर तयार गरिएको बताइएको छ। कागजात र साना पार्सलदेखि लिएर मध्यम तथा ठूला खरिद सामग्रीसम्म ढुवानी गर्न सकिने यो सेवामा विशेष गरी कार्गो विकल्पले ठूलो सवारी आवश्यक पर्ने ढुवानीलाई सहज बनाएको छ।

याङ्गो डेलिभरीले रुटिङ तथा ब्याचिङ एल्गोरिदम प्रयोग गरी ढुवानी प्रक्रियाको कार्यक्षमता बढाउने जनाएको छ। यस प्रविधिमार्फत सवारी साधनको अधिकतम उपयोग सुनिश्चित हुनुका साथै ट्राफिक अवस्थाको बाबजुद पनि समयमा डेलिभरी हुने दरमा सुधार आउने अपेक्षा गरिएको छ। साथै, पठाइएका सबै प्याकेजहरू लाइभ–ट्र्याकिङ सुविधामार्फत निगरानी गर्न सकिने हुँदा सेवा साझेदार र उपभोक्ता दुवैका लागि पारदर्शिता कायम हुने कम्पनीको भनाइ छ।

याङ्गो डेलिभरीले आफ्नै सवारी वा कुरियर सञ्चालन नगरी स्थानीय नेपाली यातायात कम्पनीहरूलाई डिजिटल माध्यमबाट सहयोग प्रदान गर्ने मोडेल अपनाएको छ। यसले अन्तिम माइल कनेक्टिभिटीमा प्रविधिको प्रयोगमार्फत कार्यक्षमता बढाउने र साझेदार चालकहरूका लागि आम्दानीका थप अवसर सिर्जना गर्ने लक्ष्य लिएको छ। याङ्गो डेलिभरीको उद्देश्य काठमाडौँमा द्रुत डेलिभरी सेवाको पहुँच विस्तार गर्दै दैनिक आवश्यकताका लागि सहज, भरपर्दो र विश्वसनीय विकल्प प्रदान गर्नु रहेको छ।

याङ्गो ग्रुपले मे २०२५ मा ‘याङ्गो’ सिटी सर्भिसेस एपमार्फत नेपाली बजारमा प्रवेश गरेको हो। काठमाडौँमा परीक्षण चरणका क्रममा राइड–हेलिङ सेवा एपभित्र उपलब्ध पहिलो सेवा बनेको थियो। हाल याङ्गो एपले राइड–हेलिङ र डेलिभरी दुवै सेवाहरू एकै प्लेटफर्ममा उपलब्ध गराउँदै काठमाडौँका बासिन्दा तथा आगन्तुकहरूको दैनिक आवागमन र ढुवानी आवश्यकतालाई सहज बनाउँदै आएको छ।