सनातन ज्ञानसत्ताको पुनर्जागरणका लागि ‘स्वदेशवादी अभियान’ घोषणा

काठमाडौँ । स्वदेशीय सनातन ज्ञानसत्ताको पुनर्जागरणमार्फत स्वदेशवादी राज्यव्यवस्था निर्माण गर्ने उद्देश्यसहित  यहाँ ‘स्वदेशवादी अभियान’ घोषणा गरिएको छ । यहाँ एक समारोहबीच रैथाने, वैदिक र बौद्ध ज्ञान परम्पराको एकीकरण गर्दै आयातित राजनीतिक र वैचारिक परनिर्भरताबाट नेपाललाई मुक्त गर्ने लक्ष्यसहित अभियान घोषणा गरिएको हो ।

घोषणासभामा नेपाल राष्ट्रिय राजनीतिक गुरुकुलका प्रमुख डा वासुदेव कृष्ण शास्त्रीले महर्षि याज्ञवल्क्यले स्थापना गर्नुभएको राजनीतिक गुरुकुल तीन हजार वर्षअघि बन्द भए पनि हाल त्यसको निरन्तरताका रूपमा पुनः अभियान अगाडि बढाइएको बताए।

उनले सनातन प्रज्ञाको जगमै दीर्घकालीन राजनीतिक स्थायित्व र सुशासन सम्भव हुने धारणा व्यक्त गरेका छन् ।

नेपाल राष्ट्रिय राजनीतिक गुरुकुलका राष्ट्रिय संयोजक सौरभले स्वदेशवादी अभियानलाई आजकै दिनदेखि मूल राजनीतिक मुद्दा बनाएर देशव्यापी रूपमा विस्तार गर्नुपर्ने आवश्यकता औँल्याएका छन्। हालका राजनीतिक दलहरू वैचारिक रूपमा दिशाहीन बनेको अवस्थामा स्वदेशीय राजनीतिक चिन्तन नै राष्ट्रको निकास भएको उनको भनाइ थियो ।

कार्यक्रममा अभियानका संयोजक सूर्य माखिमले अवधारणा पत्र प्रस्तुत गर्दै नेपाली समाज गहिरो दार्शनिक, नैतिक र राजनीतिक सङ्क्रमणमा रहेको उल्लेख गरे । उनले स्वदेशीय सनातन ज्ञानसत्तामा आधारित स्वशासन, स्वराज, स्वनिर्भर अर्थतन्त्र र राष्ट्रिय सार्वभौमिकता अभियानका मूल आधार भएको स्पष्ट पारेका छन् ।

अभियानले देशभित्र बढ्दो निराशा, युवा पलायन, परनिर्भर अर्थतन्त्र र कमजोर कूटनीतिक अवस्थालाई गम्भीर चुनौतीका रूपमा चित्रण गर्दै समाधानका लागि जनजागरण, वैचारिक दीक्षा र राष्ट्रिय राजनीतिक गुरुकुलमार्फत नेतृत्व विकास गर्ने विश्वास गरिएको छ । अभियानका क्रममा आगामी दिनमा ‘पशुपति संवाद’ तथा देशव्यापी संवाद पदयात्रामार्फत जनतासँग संवाद गर्दै अभियान विस्तार गरिने जनाइएको छ ।