सप्तकोशी डेभलपमेन्ट बैंकको नाफा आधा घट्यो

सप्तकोशी डेभलपमेन्ट बैंकले गत आर्थिक वर्षमा ३ करोड २९ लाख रुपैयाँ खुद नाफा गरेको छ । बैंकको नाफा अघिल्लो आर्थिक वर्षको तुलनामा ४९.६७ प्रतिशत कम हो । 

अघिल्लो आर्थिक वर्षको अन्त्यसम्ममा बैंकले ६ करोड ५४ लाख रुपैयाँ खुद नाफा कमाएको थियो । बैंकको वितरणयोग्य नाफा १ करोड ३० लाख रुपैयाँ रहेको छ।

कोरोना कारण व्यवसाय विस्तारमा परेको असर तथा केन्द्रिय बैंकको ब्याजदर घटाउने नीतिले नाफामा संकुचन आएको बैंकले उल्लेख गरेको छ ।

समीक्षा अवधिसम्म ३ अर्ब ४० करोड रुपैयाँ निक्षेप संकलन गरेको बैैंकले २ अर्ब ७९ करोड कर्जा लगानी गरेको छ । जसबाट ४४ करोड ५१ लाख रुपैयाँ ब्याज आम्दानी गरेको छ। खुद ब्याज आम्दानी २१ करोड ९६ लाख छ ।

बैंकको संचालन नाफा भने ७ करोड ३२ लाखबाट घटेर ४ करोड ६४ लाख रुपैयाँमा खुम्चिएको छ भने संचालन खर्च ३ करोड ३२ लाखबाट ५ करोड ५५ लाख पुगेको छ । त्यस्तै बैंकको अन्य खर्चहरु समेत बढेको छ ।

बैंकको खराब कर्जा भने घटेर १.६५ प्रतिशतमा झारेको छ। चुक्ता पुँजी ८३ करोड ४३ लाख रुपैयाँ रहेको बैंकको जगेडा कोषमा ९ करोड ४४ लाख रुपैयाँ छ। बैंकको चुक्ता पूँजी तथा जगेडाकोष दुवै बढेको छ ।

बैंकको प्रतिशेयर आम्दानी ३ रुपैयाँ ९५ पैसा, प्रतिशेयर नेटवर्थ ११३ रुपैयाँ २८ पैसा तथा मूल्य आम्दानी अनुपात ३०.३९ गुणा छ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।