चाडवाडका लागि  एक अर्ब रुपैयाँ बढीको ‘ड्राई फ्रुटस् ‘आयात

चालु आर्थिक वर्षको तीन महिनामा चाडवाड लक्षित गरी ३२ करोड नौ लाख रुपैयाँको नरिवल भित्रिएको छ । आर्थिक वर्ष २०८१\८२ को साउनदेखि असोजसम्म दसैँतिहार र छठ लक्षित गरी ६० लाख ६३ हजार पाँच सय ९५ केजी नरिवल आयात भएको हो ।

भन्सार विभागका निर्देशक एवं सूचना अधिकारी मुक्तिप्रसाद श्रेष्ठको तथ्याङ्कअनुसार पछिल्लो तीन महिनामा करिब एक अर्ब रुपैयाँ बढीको ‘ड्राई फ्रुटस्’ भित्रिएको जानकारी दिए । भारत र चीनलगायत देशबाट नरिवलसँगै, काजु, बदाम, अलमण्ड, पिस्ता, सुपारी, खजुर, छोकडा, अन्जिर र किसमिस पनि भित्रिएको उनले बताए ।

विभागका तथ्याङ्कअनुसार २६ करोड दुई लाख रुपैयाँको दुई लाख ९८ हजार नौ सय ४६ केजी काजु, १८ करोड ६० लाख रुपैयाँको दुई लाख ३२ हजार छ सय ९३ केजी बदाम र अलमण्ड आयत भएको छ । २० करोड ९८ लाख रुपैयाँको छ लाख सात हजार दुई सय २५ केजी ओखर आयात भएको छ ।

यस्तै, पिस्ता १२ हजार सात सय ७७ केजी एक करोड ४५ लाख रुपैयाँमा, २१ करोड ६२ लाख रुपैयाँमा १७ लाख १४ हजार चार सय १९ केजी सुपारी, एक करोड ३० लाख रुपैयाँमा एक लाख २४ हजार एक सय ७७ केजी खजुर र छोकडा आयात भएको छ । ४१ हजार पाँच सय ५० केजी अंजिर दुई करोड ६५ लाख रुपैयाँ, तीन लाख २४ हजार छ सय ७५ केजी किसमिस १० करोड ६२ लाख रुपैयाँमा आयात गरिएको सूचना अधिकारी श्रेष्ठले जानकारी दिए । यस्तै, चार करोड ७४ लाख रुपैयाँमा दिपावलीमा प्रयोग गरिने विभिन्न किसिमका बत्ती आयात भएका छन् ।

विभागका अनुसार यसवर्ष अघिल्लो वर्षको तुलनामा बदाम, अलमण्ड र ओखरको आयात कम भएको छ । तुलनात्मकरुपमा बदाम र अलमण्डको आयात सात प्रतिशतले कम छ । यस्तै ओखर ४४ दशमलव ६ प्रतिशतले कम आयात भएको छ ।

अघिल्लो वर्षको तुलनामा यसवर्ष बत्तीको आयात ५८ प्रतिशतले कम भएको तथ्याङ्कले देखाउछ । अघिल्लो वर्ष तीन महिनामा सात लाख ७८ हजार पाँच सय ८२ थान बत्ती नौ करोड ८४ लाख रुपैयाँमा आयात भएको थियो ।