ऐतिहासिक उचाइमा पुगेको सुनको भाउ घट्न थाल्यो

काठमाडौँ । नेपाली बजारमा दिन प्रतिदिन नयाँ कीर्तिमानी कायम गर्ने क्रममा रहेको सुनको भाउ आज सोमबार घटेको छ । सोमबार सुन तोलामा ४०० रुपैयाँले घटेको हो ।

नेपाल सुनचाँदी व्यवसायी महासंघका अनुसार सोमबार सुन प्रतितोला २ लाख ११ हजार ६०० रूपैयाँ कायम भएको छ । आइतबार सुन प्रतितोला २ लाख १२ हजार रुपैयाँमा कारोबार भएको थियो ।

यसैगरी, चाँदी पनि उच्च विन्दुमा पुगेर ओरालो लागेको छ । सोमबार चाँदी तोलामा २५ रुपैयाँले घटेको हो ।

सोमबार चाँदी प्रतितोला २ हजार ४७५ रुपैयाँ कायम भएको छ । आइतबार चाँदी प्रतितोला २ हजार ५०० रुपैयाँमा कारोबार भएको थियो ।

नेपालमा अन्तर्राष्ट्रिय बजारका आधारमा सुनको मूल्य निर्धारण गर्ने गरिएको छ ।

सोमबार अन्तर्राष्ट्रिय बजारमा सुन प्रतिऔंस ३ हजार ५८२.६६ अमेरिकी डलर र चाँदी ४०.६१ अमेरिकी डलरमा कारोबार भइरहेको छ ।