सिर्जना फाइनान्सको नाफा १५ करोड ७३ लाख, जगेडाकोषमा उच्च बढोत्तरी

सिर्जना फाइनान्सले गत आर्थिक बर्षमा १५ करोड ७३ लाख खुद मुनाफा आर्जन गरेको छ। जुन अघिल्लो आर्थिक बर्ष भन्दा २९.८७ प्रतिशत धेरै हो । अघिल्लो वर्ष फाइनान्सले १२ करोड ११ लाख कमाएको थियो ।

४६ करोड ८ लाख १५ हजार चुक्ता पुँजी रहेको फाइनान्सले जगेडा कोषमा २५ करोड ९८ लाख पुर्याएको छ । अघिल्लो आर्थिक वर्षमा जगेडा कोषमा १० करोड २८ लाख मात्र रहेको थियो ।

असार मसान्त सम्म फाइनान्सले ७ अर्ब १५ करोड निक्षे्प संकलन गरेर ४ अर्ब ८२ करोड कर्जा प्रवाह गरेको छ । जसबाट खुद ब्याज आम्दानी १५ करोड ६३ लाख गरेको छ ।

यस अवधिमा फाइनान्सको निष्कृय कर्जामा पनि उल्लेख्य सुधार गरेको छ । अघिल्लो आर्थिक वर्षमा १.३१ प्रतिशत रहेको निष्कृय कर्जा गत आर्थिक वर्षमा ०.३४ प्रतिशत कायम भएको छ । फाइनान्सको प्रति शेयर आम्दानी ३४ रुपैयाँ १४ पैसा, प्रति शेयर नेटवर्थ १५६ रुपैयाँ ३९ पैसा र मुल्य आम्दानीको अनुपात ६ रुपैयाँ छ।

फाइनान्सको सिसिडि रेसियो ६१.३० प्रतिशत रहेको छ । यस्तै आधार ब्याजदर १२.१२ प्रतिशत, कोष्को लागत ९.३७ प्रतिशत र ब्याजदर अन्तर (स्प्रेड रेट) ४.९५ प्रतिशत रहेको छ ।

कम्पनीले राष्ट्रिय स्तरको कार्यक्षेत्र विस्तारको लागि पुँजी वृद्धि गर्न लागि ६० प्रतिशत हकप्रद शेयर पनि प्रस्ताव गरेको छ । फाइनान्सले अघिल्लो आर्थिक बर्षको कमाईबाट गत बर्ष १५ प्रतिशत बोनस र ९.५ प्रतिशत नगद लाभांश घोषण गरेको थियो ।