सेञ्चुरी कमर्सियल बैंक लिमिटेड (CCBL) ले बैशाख २१ गते बुधबारदेखि २ अर्ब २० करोड रुपैयाँ बराबरको ऋणपत्र बिक्रीमा ल्याउने भएको छ । बैंकले प्रतिइकाई १ हजार रुपैयाँ अंकित दरका कुल २२ लाख इकाइ जारी गर्ने भएको हो ।
सेञ्चुरी बैंकले दश वर्ष अवधिको २ अर्ब २० करोड रुपैयाँको ‘सेञ्चुरी डिबेन्चर २०८८’ जारी गर्न लागेको हो । बैंकले निष्कासन गर्ने ऋणपत्रमध्ये ४० प्रतिशत बराबरको ८ लाख ८० हजार इकाई (म्युचुअल फण्डलाई छुट्याएको १० हजार कित्ता सहित) सर्वसाधारणका लागि खुला हुनेछ । बाँकी रहेको ६० प्रतिशत अर्थात् १३ लाख २० हजार इकाई बैंकले आफ्नै पहलमा अन्य संघसंस्थालाई बिक्री गर्ने छ ।
यस ऋणपत्र निष्काशन छिटोमा बैशाख २५ गते बन्द हुनेछ भने उक्त समयसम्म सबै ऋणपत्र बिक्री नभएको खण्डमा भने जेठ ४ गतेसम्म निष्काशन खुला रहनेछ ।
ऋणपत्रमा लगानीकर्ताले मेरो सेयरको मोबाइल एप तथा सफ्टवेयरमार्फत अनलाइनबाट आवेदन दिन सक्नेछन् । यस्तै नेपाल धितोपत्र बोर्डबाट सी–आस्वा सदस्यता स्वीकृत प्राप्त बैंक तथा वित्तीय संस्था र तिनका शाखा कार्यालयबाट पनि आवेदन दिन सकिनेछ । ऋणपत्र खरीदका लागि न्यूनतम २५ इकाईको लागि २५ हजारदेखि देखि अधिकतम ८ लाख ७० हजार इकाईको लागि ८७ करोड रुपैयाँसम्म आवेदन दिन पाइनेछ ।
दश वर्ष अवधिको ‘सेञ्चुरी डिबेन्चर २०८८’ नामक ऋणपत्रमा लगानी गर्ने लगानीकर्तालाई बैंकले वार्षिक १०.५० प्रतिशत ब्याजदर प्रदान गर्नेछ । ऋणपत्रको ब्याज अर्धवार्षिक रुपमा भुक्तानी हुनेछ ।
ऋणपत्र निष्काशन गर्न बैंकले पूँजी बजारको नियामक निकाय नेपाल धितोपत्र बोर्ड (सेबोन) बाट चैत २९ गते अनुमति पाएको थियो ।
बैंकको ऋणपत्रको निष्काशन तथा बिक्री प्रबन्धक ग्लोबल आइएमई क्यापिटल लिमिटेड रहेको छ ।
? समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।
About Us
प्रतिक्रिया