पचास करोड बढी लगानी हुने पर्यटन पुर्वाधार परियोजनामा विशेष प्याकेज

नेपाल उद्योग वाणिज्य महासंघ (एफएनसीसीआई) ले पर्यटन पूर्वाधार विकासको लागि ५० करोड भन्दा धेरै लगानी गर्नुपर्ने परियोजनामा विशेष प्याकेज उपलब्ध गराउनु पर्ने सुझाव सरकारलाई दिएको छ ।

नेपाल पर्यटकीय पर्यावरणमा धनी देश भएको र यसैकारण पर्यटन उद्योगलाई थप परिष्कृत ढङ्गबाट अघि बढाउन आवश्यक पूर्वाधारको विकास गर्नको लागि महासंघले उक्त सुझाव दिएको हो ।

नेपाल विभिन्न देशका पर्यटकहरुको पहिलो रोजाइमा रहेको गन्तव्यस्थल बनेको छ। पर्यटकहरुको संख्या वृद्धि गर्नको लागि नेपाल सुरक्षित स्थल रहेको सन्देश प्रभावकारी रुपमा पर्वाह गर्नुपर्ने छ । यसका साथै पर्यटन संग सम्बन्धित पूर्वाधारहरु जस्तै एरपोर्टको स्तर, सार्वजनिक सवारी, बसपार्क, चार्जिङ स्टेशन र पर्यटक सूचना केन्द्रको राम्रो विकास गर्नुपर्ने महासंघले सुझाएको छ ।

नेपालमा मुख्यतयाः भारतीय पर्यटकहरु उच्च मात्रामा आउने गरेका छन् । त्यसैले भारत लक्षित उच्च मुल्य अभिवृद्धि हुनसक्ने योजना ल्याउन निजी सार्वजनिक साझेदारी हुनुपर्ने महासंघले बताएको छ । यसैगरी भारतीय पर्यटकहरुको लागि नगद रकम बोक्न सक्ने सीमा वृद्धि गरी भा.रु २ लाख पु¥याउनु पर्ने र भा.रु. २००, ५०० र २,००० का नोट नेपालमा चल्ने व्यवस्था गर्नुपर्नेमा पनि महासंघले प्रकाश पारेको छ ।

नेपालको पहाडी भूभाग ६८ प्रतिशत रहेको छ । सो क्षेत्रमा केवलकार लगायतका साहसीक परियोजनाहरु अघि बढाउनु पर्नेछ । यसका साथै पर्यटन पूर्वाधार विकासका लागि चाहिने जग्गा सरकारले न्युनतम भाडा लिई उपयोग गर्न दिनुपर्ने र सो जग्गाको समयावधि न्युनतम ५० वर्ष गराउने र त्यसपछि स्वतः नवीकरण हुनेगरी ग्राह्रयता दिनुपर्ने महासंघले जनाएको छ ।

धार्मिक पर्यटन, विवाह समारोह, सभा सम्मेलन, खेलकुद, स्वास्थ्यउपचार, स्पा, योग ध्यान, सहासिक पर्यटन आदिको प्रवद्र्धनको लागि एकद्धार सेवा प्रदान गर्नुपर्नेमा पनि महासंघले जोड दिएको छ ।

यसैगरी नेपाल प्राकृतिक सम्पदा तथा जडीबुटीमा सम्पन्न राष्ट्र भएकाले निजी क्षेत्रको संलग्नतामा आर्युवेदिक ग्राम, प्राकृतिक उपचार केन्द्र परियोजनाहरुको विकासको लागि नीति, नियम निर्माण गर्नुपर्ने लगायतका सुझाव महासंघले दिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।