बैंकहरुमा तरलता अभाव बजेट खर्च निराशाजनक, पहिलो त्रैमासमा साढे ११ प्रतिशत मात्रै खर्च

वित्तीय प्रणालीमा लगानी योग्य रकमको अभाव भईरहेका बेला यता सरकारको बजेट खर्चको अवस्था भने विगतका वर्षहरुमा जस्तै निराशाजनक रहेको छ ।

सरकारले चालु आर्थिक बर्षको पहिलो त्रैमास अर्थात तीन महिनाको अवधिमा कूल बजेटको ११.६१ प्रतिशत मात्र बजेट खर्च गरेको छ ।

सरकारले चालू आर्थिक वर्षमा १५ खर्ब ३२ अर्ब रुपैयाँ बराबरको बजेट ल्याएको थियो।

तर तीन महिनाको अवधिमा एक खर्ब ७७ अर्ब ९८ करोड मात्रै बजेट खर्च भएको छ । महालेखा नियन्त्रकको कार्यालयका अनुसार असोज ३० गतेसम्म सो बजेट खर्च गरेको हो ।

सरकारले पहिलो त्रैमासिक अवधिमा एक खर्ब ५६ अर्ब ७३ करोड चालु खर्च, १८ अर्ब ३६ करोड पूँजीगत खर्च र २ अर्ब ८८ करोड वित्तीय खर्च गरेको छ ।

३ महिनाको अवधिमा कूल बजेटको १६.३८ प्रतिशत चालु खर्च गरेको छ भने पूँजीगततर्फ ४.४१ प्रतिशत र वित्तीय व्यवस्थातर्फ १.७२ प्रतिशत बजेट खर्च भएको छ।

सरकारले चालू आवमा ९ खर्ब ५७ अर्ब १० करोड १४ लाख रुपैयाँ चालू खर्च गर्ने लक्ष्य राखेको छ भने ४ खर्ब ८ अर्ब रुपैयाँ पूँजीगत बजेट छुट्याएको थियो । वित्तीय व्यवस्थापनको लागि चालू वर्षमा १ खर्ब ६७ अर्ब ८५ करोड रुपैयाँमा बजेट विनियोजन गरिएको छ ।

राजश्व संकलन पनि सुस्त

सरकारले चालू आर्थिक वर्षको ३ महिनामा १ खर्ब ८२ अर्ब ७० करोड ०२ लाख रुपैयाँ राजश्व संकलन गरेको छ । जुन लक्ष्यको १६.४३ प्रतिशत हो ।

सरकारले यस अवधिमा कर शीर्षक अन्तर्गत १ खर्ब ७२ अर्ब १८ करोड ८४ लाख र गैरकर शीर्षक अन्तर्गत १० अर्ब ५१ करोड १८ लाख रुपैयाँ राजश्व संकलन गरेको छ । सरकारले चालू आर्थिक वर्षमा ११ खर्ब १२ अर्ब रुपैयाँ राजस्व संकलन गर्ने लक्ष्य लिएको छ ।