‘सेफ्टी’ प्याड उत्पादक ज्यास्मीन हाइजीन प्रोडक्टको वार्षिक आम्दानी ५० करोड धेरै

नेपालमा महिलाहरुले प्रयोग गर्ने ‘सेफ्टी’ ब्रान्डको सेनेटरी प्याड उत्पादन गर्दै आएको ज्यास्मीन हाइजीन प्रोडक्ट्स प्रालिले सन् २०२२ मा ५० करोड ३० लाख बराबरको सञ्चालन आम्दानी गरेको छ ।

कम्पनीको ह्रासकट्टी, अर्मोटाइजेसन, ब्याज, कर र भाडा सहितको नाफा कुल सञ्चालन आम्दानीको ११.९१ प्रतिशत रहेको छ । यस्तै कम्पनीले लिने ऋणको ब्याज भुक्तानी गर्न सक्ने क्षमता कुल ऋणको १.३६ गुणा रहेको छ ।

सन् २००४ मा पार्टनरसीप फर्मको रुपमा स्थापना भएको कम्पनी सन् २०२१ मा शारडा ग्रुपले स्वामित्व लिई सञ्चालन गरिरहेको छ । कम्पनीले सेफ्टी ब्रान्डको प्याड र कडल्र्स ब्रान्डको बच्चाहरुले प्रयोग गर्ने डायपर उत्पादन गर्दै आएको छ । वार्षिक रुपमा कम्पनीको उत्पादन क्षमता ५ करोड थान प्याड ४ करोड ५० लाख थान डायपर र ६ करोड थान मास्क बराबर रहेको छ ।

नेपालमा विदेशी ब्रान्डका प्याड सस्तो तथा सर्वसुलभ मूल्यमा उपलब्ध हुँदा नेपाली ब्रान्डका प्याडहरुको प्रयोगमा कमी हुँदै गएको छ । तथापि सरकारले स्वदेशी उत्पादनलाई नै प्राथमिकता दिन सरकारी स्कुल तथा सरकारी कलेज, कार्यालयहरुमा नेपालमा नै निर्माण भएका प्याडहरुको प्रयोग बढाएको छ ।

विदेशी ब्रान्डसँग प्रतिस्पर्धा गर्न नसक्नु नै नेपाली प्याड उत्पादक कम्पनीहरुको कमजोरी रहेको छ । नेपाली बजारमा अन्तर्राष्ट्रिय ब्रान्डका प्याडहरु बढी उपलब्ध हुँदा स्वदेशी कम्पनीहरुले बजार लिन सकेका छैनन् ।

तथापि कम्पनीमा व्यापारिक घराना शारडा ग्रुपको लगानी रहेको छ । उत्पादनको क्षेत्रमा १८ वर्षभन्दा लामो अनुभव भएका पुनित शारडा कम्पनीका प्रबन्ध निर्देशक रहेका छन् । अनुभवी प्रमोटर भएका कारण कम्पनीलाई वित्तीय तथा प्राविधिक सहयोग मिलेको छ ।

कम्पनीले ६२ करोड ९० लाख रुपैयाँ बराबरको कर्जाका लागि रेटिङ गराएको छ । २ करोड ६४ लाख २० हजार रुपैयाँ बराबरको दीर्घकालीन कर्जाका लागि केयर नेपालले कम्पनीलाई डबल बी माइनस र ६० करोड २५ लाख ८० हजार बराबरको अल्पकालीन कर्जाका लागि ए–४ रेटिङ गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।