दश महिनामा भएको कुल निर्यात रकम डिजेल आयातमा नै ठिक्क

चालु आर्थिक वर्षको दश महिना अर्थात बैशाख महिनासम्म नेपालले अन्य देशमा बिक्री गरे वापत प्राप्त भएको रकम नेपालले उपयोग गर्ने पेट्रोलियम पदार्थभित्रको एक डिजेल आयातमा नै ठिक्क भएको छ ।

भन्सार विभागले सार्वजनिक गरेको विवरण अनुसार साउनदेखि बैशाखसम्मको अवधिमा नेपालले १ खर्ब ३० अर्ब ९० करोड रुपैयाँ बराबरको वस्तु निर्यात गरेको छ । तर नेपालबाट भएको निर्यात र डिजेल आयात लगभग उत्तिकै मात्रामा देखिएको छ । कुल पेट्रोलियम पदार्थको आयातमा डिजेलको हिस्सा आधा बढी अर्थात ५०.२० प्रतिशत छ ।

निर्यात बराबरको रकमले नेपालमा डिजेल र पेट्रोल पनि आयात हुने देखिँदैन । दश महिनाको अवधिमा १ खर्ब २५ अर्ब ३६ करोड ३९ लाख ३९ हजार बराबरको डिजेल आयात भएको छ । यस हिसाबले डिजेल आयातको तुलनामा कुल निर्यात करिब ५ अर्ब ५४ कारोड रुपैयाँ मात्र बढी छ । यस्तै यस अवधिमा ५५ अर्ब ७९ करोड २५ लाख रुपैयाँको पेट्रोल र ४९ अर्ब ७२ करोड ८४ लाख ८४ हजार रुपैयाँ बराबरको एलपी ग्याँस आयात भएको छ । बैशाखसम्म कुल २ खर्ब ४९ अर्ब ७३ करोड १४ लाख ११ हजार रुपैयाँ बराबरको पेट्रोलियम पदार्थ आयात गरेको छ ।

दश महिनाको अवधिमा वस्तु आयातमा कूल १३ खर्ब ३५ अर्ब ३२ करोड २४ लाख ६२ हजार रुपैयाँ बाहिरिएको छ । डिजेल, पेट्रोल पछि फलाम र त्यससँग सम्बन्धित उत्पादनको आयात बापत ३४ अर्ब ८१ करोड ९३ लाख ६३ हजार रुपैयाँ बाहिरिएको छ ।

यद्यपी गत आर्थिक वर्षको दश महिनासम्मको तुलनामा समग्र आयातमा भने कमी आएको छ । गत आवको सोही महिनासम्म १६ खर्ब ४ अर्ब ६५ करोड २५ लाख रुपैयाँको वस्तु आयात भएको थियो । यो तथ्यांकले १६.७८ प्रतिशत आयात घटेको देखाउँछ । आयात घटे पनि निर्यात विस्तार हुन नसक्दा व्यापार घाटा कायमै छ ।

चालु आर्थिक वर्षको दश महिना अर्थात साउनदेखि बैशाखसम्ममा मुलुकको कूल व्यापार घाटा १४ खर्ब ६६ अर्ब २२ करोड २५ लाख पुगेको छ । गत वर्षको सोही अवधिमा नेपालले १७ खर्ब ७८ अर्ब रुपैयाँको कुल वैदेशिक ब्यापार भएको थियो । कुल वैदेशिक ब्यापारमा १७.५४ प्रतिशतको गिरावट आएको छ ।

चालु आर्थिक वर्षको साउनदेखि बैशाखसम्ममा मुलुकको कूल व्यापार घाटा १२ खर्ब ४ अर्ब ४२ करोड २४ लाख पुगेको छ । गत वर्षको सोही अवधिमा नेपालले १४ खर्ब ३१ अर्ब ३० करोड ४३ लाख रुपैयाँको व्यापार घाटा व्यहोरेको थियो । व्यापार घाटामा गत आर्थिक वर्षको यसै अवधिको तुलनामा १५.८५ प्रतिशतले घटेको हो ।

? समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।