एघार महीनामा पौने ४२ अर्बको धितोपत्र बिक्री अनुमति, ३९ अर्बको बोनस नेप्सेमा सूचीकृत

पुँजी बजारको नियामक निकाय नेपाल धितोपत्र बोर्डले चालु आर्थिक वर्ष २०७९–८० को ११ महीनामा कुल ४१ अर्ब ७७ करोड रुपैयाँ बराबरको धितोपत्र सार्वजनिक निष्काशनका लागि अनुमति दिएको छ ।

नेपाल राष्ट्र बैंकले उपलब्ध गराएको त्थ्याङ्क अनुसार समीक्षा अवधिमा नेपाल धितोपत्र बोर्डले १४ अर्ब १५ करोड रुपैयाँ बराबरको म्युचुअल फन्डका इकाई, १३ अर्ब ५ करोड रुपैयाँ बराबरको साधारण सेयर (आईपीओ), ११ अर्ब ६० करोड रुपैयाँ बराबरको डिबेन्चर र २ अर्ब ९८ करोड रुपैयाँ बराबरको हकप्रद सेयर निष्कासनका लागि अनुमति दिएको हो ।

नेपाल राष्ट्र बैंकका अनुसार चालु आर्थिक वर्षको ११ महीना अवधिमा कुल २ खर्ब ९९ अर्ब १ करोड रुपैयाँ बराबरको थप धितोपत्र नेपाल स्टक एक्सचेञ्ज (नेप्से) मा सूचीकृत भएका छन् ।

केन्द्रीय बैंकका अनुसार १ खर्ब ७६ अर्ब १० करोड रुपैयाँ बराबरको साधारण सेयर नेप्सेमा सूचीकृत भएको छ । यस्तै ४५ अर्ब रुपैयाँ बराबरको विकास ऋणपत्र र २९ अर्ब १९ करोड रुपैयाँ बराबरको डिबेन्चर नेप्सेमा सूचीकृत भएको छ । यसैगरी २०७९ साउनदेखि २०८० जेठसम्ममा विभिन्न सूचीकृत कम्पनीहरुले वितरण गरेको ३९ अर्ब ९ करोड बराबरको बोनस सेयर, ५ अर्ब ४९ करोड रुपैयाँ बराबरको म्युचुअल फण्ड र ४ अर्ब १३ करोड रुपैयाँ बराबरको हकप्रद सेयर सूचीकृत भएको हो ।

हालसम्म नेपाल स्टक एक्सचेन्ज लिमिटेडमा जेठ मसान्तमा सूचीकृत ७ अर्ब २८ करोड सेयरको चुक्ता मूल्य ७ खर्ब १८ अर्ब ४६ करोड रुपैयाँ रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।