पोखराको मेथलाङमा डेढ अर्ब लागतमा ‘ले ग्लेमर’ लक्जरी रिसोर्ट बन्दै, एकवर्ष भित्र सञ्चालनमा आउने

पर्यटकीय नगरी पोखरास्थित सराङकोटको मेथलाङमा ले ग्लेमर लक्जरी रिसोर्ट एण्ड वेलनेस स्पा प्रालिले निमार्ण गरिरहेको पाँच तारे स्तरको ‘ले ग्लेमर लक्जरी रिसोर्ट’ सन २०२४ को सेप्टेम्वरदेखि संचालनमा आउने भएको छ ।

कम्पनीले सराङकोटको मेथलाङमा १ लाख ३१ हजार ३५१ स्क्वायर फिट क्षेत्रफलमा २७ वटा स्वीट रुम र ३ भिल्लासहितको रिसोर्ट निर्माण गरिरहेको छ । एक अर्ब ५५ करोड ८० लाखको लागतमा निमार्णधिन रिर्सोटको ७४ प्रतिशत निमार्ण कार्य सम्पन्न भएको छ ।

उक्त रिर्सोट ८० करोड कर्जा तथा ७५ करोड ८० लाख रुपैयाँ लगानीकर्ताको लगानी मार्फत निर्माण भइरहेको कम्पनीले जनाएको छ । सन २०२३ को जुलाईसम्ममा कम्पनीमा लगानीकर्ताहरुले ६२ करोड रुपैयाँ लगानी गरिसकेका छन् ।

हाल कम्पनीले ८६ करोड रुपैयाँको कर्जा सुविधाका लागि रेटिङ गराएको छ । जसमा रेटिंग एजेन्सी केयर रेटिङ नेपालले यसलाई ८० करोड रुपैयाँको दीर्घकालिन कर्जा सुविधाका लागि डबल बि माइनस र ६ करोड रुपैयाँको अल्पकालीन कर्जा सुविधाका लागि ए फोर रेटिंग दिएको छ ।

पाँच तारे स्तरको रिसोर्ट कैलाश ग्रुप अफ कम्पनीको संलग्नता समेत रहेको छ । जुन कम्पनी नेपालको पर्यटकीय क्षेत्रमा लामो समयदेखि राम्रो उपस्थिति भएको कम्पनी हो । बुटिक होटल, टुर्स कम्पनी तथा हेलिकप्टर सर्भिस दिने यो कम्पनीले नै पोखराको ले ग्लेमर लक्जरी रिसोर्ट एण्ड वेलनेस स्पा प्रालिमा साझेदारको रुपमा रहेको छ । रिसोर्ट टासी गुरुङको व्यवस्थापकीय नेतृत्वमा निर्माण भइरहेको छ । उनको यो क्षेत्रमा २६ वर्ष बढीको अनुभव रहेको छ ।

रिर्सोट पोखरा सराङकोटस्थित मेथलांङ डाँडामा रहेको छ, जुन पोखरा अन्तर्राष्ट्रिय विमानस्थल क्षेत्रबाट ८.४ किमिको दूरीमा रहेको छ । रिर्सोटमा कोठा र भिल्लाबाहेक स्वमिङ पुल, जकुज्जी, लाइब्रेरी, मेडिटेसन हल, कन्फ्रेन्स तथा ब्यांक्वेट हल समेत रहनेछन।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।