पाँच सय बढी मानिसहरुको रोजगार कटौती गर्दै स्नापच्याट

विश्वमा सबैभन्दा बढी प्रयोग हुने सामाजिक सञ्जालको सूचीको शीर्ष पाँचमा पर्ने स्नापच्याटले विश्वका विभिन्न देशहरुमा कार्यरत पाँच सय बढी मानिसहरुको रोजगार कटौती गर्ने घोषणा गरेको छ ।

आर्थिक वर्ष २०२३/२४ को अन्तिम त्रैमासको प्रगति विवरण सार्वजनिक गर्ने एक दिन अगावै कम्पनीले विश्वव्यापी रुपमा कम्पनीमा काम गर्दै आएका कुल कर्मचारी मध्ये १० प्रतिशत मानिसहरुको रोजगार कटौती गर्ने निर्णय गरेको हो ।

सन् २०२३ को अक्टोबर महिनामा तेस्रो त्रैमासको प्रगति विवरण सार्वजनिक गर्दै कम्पनीले आफूहरु ३६ करोड ८० लाख डलर घाटामा रहेको जनाएको थियो । पछिल्लो समयमा सामाजिक सञ्जालमा डिजिटल विज्ञापन घट्दै जाँदा कम्पनीको नाफा समेत घट्दै गएको छ । जसकारण ठूला सामाजिक सञ्जालहरुले नै रोजगार कटौती गरिरहेका छन् ।

सन् २०२४ मा मात्रै माइक्रोसफ्टले आफ्नो गेमिङ विभागका एक हजार ९०० कर्मचारी कटौती गर्ने निर्णय गरेको छ । यस्तै इबेले गत साता एक हजार रोजगार कटौती गरेको छ । जनवरी महिनाको दोस्रो साता पेपलले २ हजार ५०० कर्मचारी र गुगलले एक हजार कर्मचारी कटौती गरेको छ ।

सन् २०२० मा जब विश्वव्यापी रुपमा कोभिड–१९ संक्रमण फैलिएको थियो । विश्वका अधिकांश देशहरुमा लकडाउनको घोषणा गरिएको थियो जसकारण मानिसहरु अन्य वर्षको तुलनामा कोभिडको समयमा सामापजक सञ्जालमा बढी सक्रिय भएका थिए । प्रयोगकर्ताको सङ्ख्या बढ्दै जाँदा कम्पनीहरुले कर्मचारीको सङ्ख्या बढाए तर जब सन् २०२२ मा कोभिड–१९ संक्रमण नियन्त्रणमा आयो तब मानिसहरु पुरानै समयमा फर्किए, सामाजिक सञ्जालमा प्रयोगकर्ताहरुको सङ्ख्या घट्दै गयो । प्रयोगकर्ताको सङ्ख्या घट्दै जाँदा विभिन्न कम्पनीहरुले सन् २०२२ देखि नै कर्मचारी कटौती गरिरहेका छन् ।

यस अघि सन् २०२२ को अगस्ट महिनामा स्नापच्याटले कुल कार्यदलको २० प्रतिशत सङ्ख्या कटौती गर्ने निर्णय गरेको थियो । सन् २०२४ मा कम्पनीले पुनः १० प्रतिशत कर्मचारी कटौती गर्ने घोषणा गरेको हो । कर्मचारी कटौती पछि कम्पनीका प्रवक्ताले ‘कम्पनीबाट बिदाइ भएर जानुहुने कर्मचारीहरुले कम्पनीको प्रगतिका लागि गर्नु भएको कडा मिहिनेत र योगदानको कदर गर्दै यहाँहरुलाई कम्पनीले सदैव गरिरहने’ बताएका हुन् ।

स्नापच्याटले विश्वव्यापी रुपमा कार्यरत कर्मचारीहरु मध्ये १० प्रतिशत कर्मचारी कटौती गर्ने घोषणा गरेता पनि कुन देशका कर्मचारीहरुले आफ्नो रोजगार गुमाउने छन् भन्ने कम्पनीले खुलाएको छैन ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।