हिमालयन रिको ३० कित्ताभन्दा कम सेयर हुनेले बोनस पाउन अर्को वर्षको लाभांशसम्म पर्खनुपर्ने

हिमालयन रिइन्स्योरेन्सले न्यून लाभांश प्रस्ताव गरेपछि प्रिमियम मूल्यमा कम्पनीको आईपीओ भरेका लगानीकर्ताले यो वर्ष लाभांश नपाउने भएका छन् ।

सर्वसाधारणबाट प्रतिसेयर १०६ रुपैयाँ प्रिमियम सहित २०६ का दरले उठाएको कम्पनीले सर्वसाधारणलाई ४ प्रतिशत बोनस वितरणको प्रस्ताव गरेको छ । यस हिसाबले कम्पनीको ३० कित्ता वा सो भन्दा बढी सेयर हुने लगानीकर्ताले मात्रै यो वर्षको लाभांश डिम्याट खातामा पाउनेछन् । २० कित्तासम्म आईपीओ हात पारेका लगानीकर्ताले बोनसको रुपमा खण्डित रुपमा मात्र सेयर पाउने भएकाले कम्पनीले अर्को वर्षमा दिने बोनस जोडेर मात्र एकमुष्ट रुपमा सेयर हात पार्नेछन् ।

कुनै पनि कम्पनीले पूर्ण अंकमा कायम नभई सेयर लगानीकर्तालाई बोनस खातामा पठाउनेगर्दैन । यसअनुसार १०कित्ता सेयर हुनेले ०.४० कित्ता र २० कित्ता सेयर हुनेले ०.८० कित्ता बोनस पाउने हुन्छ । ३० कित्ता सेयर हुनेले १.२ कित्ता बोनस पाउने हुँदा १ कित्ता बोनस डिम्याट खातामा पाउनेछन् भने ०.२० कित्ता बोनस पाउन अर्को वर्षको बोनस पर्खनुपर्ने हुन्छ । ५० कित्ता सेयर हुनेले भने २ कित्ता बोनस पाउनेछन् ।

हिमालयन रिले  सेयरधनीलाई ४ प्रतिशत बोनस सेयर र सो बोनसको कर प्रयोजनका लागि ०.२१ प्रतिशत नगद लाभांश वितरण प्रस्ताव गरेको छ । कम्पनीको माघ २५ गते बसेको सञ्चालक समिति बैंठकले सो लाभांश वितरणको प्रस्ताव गरेको हो । आईपीओ खरिद रकमका हिसाबले कम्पनीको लाभांश १.९४ प्रतिशत बराबर हुन आउँछ । यद्यपी कम्पनीको प्रिमियम फिर्ता गर्नुपर्ने मुद्दा अदालतमा फैसला हुने क्रममा रहेको छ ।

कम्पनीले प्रस्ताव गरेको लाभांश नियामक निकाय नेपाल बीमा प्राधिकरणबाट स्वीकृत भई कम्पनीको आगामी वार्षिक साधारण सभाबाट पारित भएपछि मात्र सेयरधनीले पाउनेछन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।