नेप्सेको वृद्धि टिकेन, गिरावट थप गहिरिँदा २७ अंकले ओरालो लाग्यो बजार

नयाँ अर्थमन्त्री वर्षमान पुनको नियुक्तिसँगै बढेको नेप्सेको वृद्धिले निरन्तरता पाउनेमा सेयर बजारका लगानीकर्ता भने आशावादी देखिएर बजारको वृद्धि भने अस्थीर देखिएको छ ।

नयाँ अर्थमन्त्रीपछि पछिल्ला १०३ अंक बढीले बढेको बजारमा बुधबार र बिहीबार दुई दिनमा ३०.३२ अंकले घटेको हो । बुधबार २.४८ अंकले घटेर बन्द भएको बजारमा बिहीबार थप गहिरिँदै २७.८४ बिन्दुले बजार घटेको हो । अल्पकालीन लगानीकर्ताको छोटो समयमा नै नाफा सुरक्षित गर्ने होडले नेप्सेमा करेक्शन जारी रहेको छ ।

मंगलबार ५८.५८ अंकले बढेको बजार बुधबार २.४७ र बिहीबार २७.८४ बिन्दुले घटेसँगै नेप्से परिसूचक २०८०.८७ बिन्दुमा झरेको छ । यस दिन कारोबारमा आएकासबै १३ उपसमुहगत सूचक राताम्मे देखिएका छन् । जीवन बीमा सर्वाधिक २.६५ प्रतिशतले घट्दा त्यसलाई पच्छाउँदै लघुवित्त पनि २.०९ प्रतिशतले ओरालो लागेको छ । यसअघिका दिनमा यी दुबै सूचकमा आकर्षक सुधार भएको थियो । यस्तै निर्जीवन बीमा, विकास बैंक, लगानी, बैंकिङ्ग, फाइनान्स र उत्पादन तथा प्रशोधनमुलक इन्डेक्स पनि १ प्रतिशतभन्दा धेरैले घटेको छ ।

नेप्सेमा गिरावट आएपछि बिहीबार कारोबार रकम समेत संकुचित बनेको छ । आज कारोबार चार अर्ब तल झरेको छ । बिहीबार ३०३ कम्पनीको १ करोड १४ लाख ८३ हजार ६१७ कित्ता सेयर ३ अर्ब ९४ करोड ३५ लाख ९२ हजार ३०२ रुपैयाँमा समेटिएको छ । अघिल्लो दिन बुधबार ३१० स्टकको १ करोड ८ लाख ८९ हजार कित्ता सेयर ४ अर्ब २४ करोड ८५ लाख रुपैयाँमा खरिद बिक्री भएको थियो । दैनिक कारोबार रकम आज ३० करोड ५० लाख रुपैयाँले घटेको हो ।

बजार घटेपनि आज दुई कम्पनीको सेयर मूल्यमा सकारात्मक सर्किट लागेको छ ।यसदिन वीन नेपाल लघुवित्तको र मानुषी लघुवित्तको सेयर मूल्य १० प्रतिशतले बढेको हो । यस्तै गुराँस लघुवित्तको ९.९२ प्रतिशत, कर्णाली डेभलपमेन्ट बैंक ७.७१ प्रतिशत, समाज लघुवित्तको सेयर मूल्य ७.२० प्रतिशतले बढेको छ। मनकामना स्मार्ट लघुवित्त ६.१७, सबैको लघुवित्त ४.५८ र उन्नति सहकार्य लघुवित्तको २.९६ प्रतिशतले बढेको हो ।

उता बिहीबारको बजारबाट स्वाभिमान लघुवित्तका सेयरधनीले सर्वाधिक ६.०२ प्रतिशतले गुमाएका छन् । यस्तै जाल्पा लघुवित्त ५.६६ प्रतिशत, धौलागिरी लघुवित्तको ५.३१ प्रतिशत, लाइफ इन्स्योरेन्स कर्पोरेसन (एलआईसी) को ५.२० र एनआईसी एशिया लघुवित्तको सेयरको भाउ ५.१३ प्रतिशतले घटेको छ ।

दैनिक कारोबार रकमका आधारमा आज पनि अपर तामाकोशी शीर्ष स्थानमा छ । सो कम्पनीको ५० करोड ८९ लाख ८ हजार रुपैयाँ बराबरको सेयर खरिद बिक्री भएको छ । हिजो नकारात्मक सर्किट लागेर घटेपछि आज अपर तामाकोशीको सेयरमा खरिद चाप आएपछि मूल्य बढको छ ।

त्यसैगरी शिवम् सिमेन्ट्सको २४ करोड ४ लाख, सोनापुर मिनरल्स एण्ड आयलको १६ करोड २४ लाख, गोर्खाज फाइनान्सको १२ करोड ७६ लाख रुपैयाँ र हिमालयन रि इन्स्योरेन्सको ९ करोड ८४ लाख रुपैयाँ बराबरको सेयर कारोबार भएको छ ।

बिहीबारको बजार घटाइपछि कुल बजार पुँजीकरण ३२ खर्ब ७० अर्ब ८५ करोड ८८ लाख ६७ हजार रुपैयाँमा समेटिएको छ । अघिल्लो कारोबार दिन बुधबार कुल बजार पुँजीकरण ३३ खर्ब १४ अर्ब ६२ करोड ९६ लाख रुपैयाँ थियो । आज मात्रै ४३ अर्ब ७७ करोड ८ लाख रुपैयाँले बजार पुँजीकरण घटेको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।