बाढीले आयोजना क्षति पुर्याएपछि पाँचथर पावर १२ करोड बढी घाटामा

गत असार महिनामा आएको बाढीले आयोजनालाई क्षति पुर्याएपछि पाँचथर पावर कम्पनी लिमिटेडले चालु आर्थिक वर्ष (आव) को तेस्रो त्रैमाससम्ममा १२ करोड ५ लाख ८५ हजार रुपैयाँ घाटा व्यहोरेको छ ।

अघिल्लो आवको सोहि अवधिसम्म कम्पनीले ८ करोड ६० लाख ६५ हजार रुपैयाँ खुद नाफा आर्जन गरेको थियो । गत असारदेखि आयोजना बन्द रहँदा कम्पनीले विद्युत बिक्रीमार्फत कुनै पनि आम्दानी गर्न सकेको छैन । अहिले आयोजना पुनःनिर्माण तथा मर्मत कार्य भईरहेको बताइएको छ । बाढीले आयोजनाको सिभिल संरचनासहित पावर हाउस लगायत इलेक्ट्रो मेकानिकल इक्यूपमेन्ट समेतमा क्षति हुन गएकाले आगामी असार मसान्तसम्ममा आयोजना पुनःमर्मत कार्य भईसक्ने कम्पनीले जनाएको छ ।

यस त्रैमासमा आम्दानी लसको प्राप्त गरेको बीमा बापत प्राप्त भएको ८ करोड रुपैयाँलाई अन्य आम्दानीमा लेखांकन गरिएको कम्पनीले जनाएको छ । चैत मसान्तसम्म वित्तीय खर्च नै ११ करोड ९० लाख बढी भएको कम्पनीको ह्रासकट्टी ६ कराड ७४ लाख र सञ्चालन खर्च १ करोड ३५ लाख कर्मचारी खर्च ३२ लाख छ ।

चुक्ता पुँजी ९६ करोड २५ लाख रुपैयाँ रहेको कम्पनीको जगेडा कोष १ करोड ७९ लाख रुपैयाँले ऋणात्मक छ । कम्पनीको कुल चालु सम्पत्ति २० करोड २८ लाख र कुल चालु दायित्व २६ करोड ७७ लाख रुपैयाँ छ ।

समीक्षा अवधिसम्म कम्पनीको वार्षिक प्रतिसेयर आम्दानी ०.१३ रुपैयाँ ऋणात्मक छ । यस्तै प्रतिसेयर नेटवर्थ ९८.१३ रुपैयाँ, प्रतिसेयर कुल सम्पत्तिको मूल्य २६३.२० रुपैयाँ र तरलता अनुपात ०.७६ प्रतिशत कायम भएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।