सेयर बजारमा उत्साह, ४७ अंकले नेप्से बढेपछि २१०० बिन्दुमा

सत्ता साझेदार दलहरुबीचआएको अविश्वासका कारण नेकपा एमाले–कांग्रेसले सत्ता सहकार्य गर्ने समझदारी बनेसँगै साताको तेस्रो कारोबार दिन मंगलबार सेयर बजारमा उच्च अंकको बढोत्तरी भएको छ ।  दुई ठूला दल नेकपा एमाले र कांग्रसबीच सोमबार राति नयाँ सरकार गठन गर्ने सहमति भएसँगै सेयर बजार तरङ्गित भएको हो । प्रारम्भिक सहमति अनुसार एमालेले अर्थसहित ९ वटा र कांग्रेसले गृहसहित १० वटा मन्त्रालय लिने सहमति छ ।

विकसित राजनीतिक घटनाक्रमले प्रभावित भएको मंगलबारको नेपाली धितोपत्रको दोस्रो बजार १ मिनेट २३ सेकेण्डमा ४ प्रतिशत बढेर २० मिनेटको लागि बन्द भयो । सोपछि खुलेको बजार १६ सेकेण्डमा नै थप १ प्रतिशत बढेर पुनः ४० मिनेटका लागि सेयर कारोबार बन्द भयो। सोलगतै प्रधानमन्त्री पुष्पकमल दाहालले तत्काल राजीनामा नदिने समाचार बाहिरिएसँगै नेप्सेमा तेस्रो सर्किट लाग्न सकेन ।

मंगलबार बिहानै दुई पटक नेप्सेमा सर्किट लागेर बन्द भएको बजार सूचक नेप्से वर्तमान प्रधानमन्त्री पुष्पकमल दाहालले विश्वासको मत परीक्षण गर्ने समाचार बाहिरिएसँगै नेप्सेमा करेक्शन आएको थियो । १०२ अंकसम्म बढेको बजार सूचक २ मिनेमा नै ७६ अंकसम्म घटेर २०८५ बिन्दुसम्म झरेको थियो । पछि पुनः बजारले लय समातेसँगै ४७.०४ अंकको वृद्धिसँगै २१०० दशमलव ४३ बिन्दुमा पुगेको छ ।

आज कारोबारमा आएका १३ ओटै उपसमूहगत परिसूचक बढेको छ । जसमध्ये उत्पादन तथा प्रशोधन उपसमूहको परिसूचक सर्वाधिक ३.३० प्रतिशत बढेको छ भने बैंकिङ्ग र व्यापार उपसमूहको परिसूचक ३ प्रतिशतभन्दा बढी बढेको छ । निर्जीवन बीमा २.४३ प्रतिशत, लगानी २.३१, जीवन बीमा २.१७, वित्त २.११ प्रतिशत र विकास बैंक २.०१, ले बढेको छ । यस दिन होटल तथा पर्यटन, जलविद्युत, लघुवित्त र अन्य उपसमूहको परिसूचक १ प्रतिशतभन्दा धेरै बढेको छ ।

कारोबारमा आएका ३१५ कम्पनीमध्ये २५१ कम्पनीको सेयर मूल्य बढेको छ भने ५६ ओटाको मात्रै घटेको छ । ७ ओटा धितोपत्रको मूल्य आज स्थिर रह्यो । त्यस्तै, सेन्सेटिभ इन्डेक्स ८.९४ अंकले बढ्दा फ्लोट इन्डेक्स ३.३५ अंकले बढेको छ भने सेन्सेटिभ फ्लोट इन्डेक्स ३.१८ अंकले बढेको छ ।आज ३१५ कम्पनीका ६० हजार ७२० पटकको कारोबारमा ११ करोड ६४ लाख ५ हजार ९०५ कित्ता सेयर खरिद बिक्री भएको छ । जसमा कारोबार रकम ४ अर्ब ५७ करोड ६८ लाख ३१ हजार ७ सय २० रुपैयाँ रहेको छ । 

एनआएन इन्फास्टक्चरको सर्वाधिक कारोबार

आजको बजारमा एनआएन इन्फास्टक्चरको सर्वाधिक कारोबार भएको छ । कम्पनीको १२ करोड ३३ लाख ८५ हजार रुपैयाँ बराबरको सेयर कारोबार भएको छ ।

यसैगरी गुडबिल फाइनान्सको ११ करोड १० लाख, युनाईटेड इदीमर्दीको १० करोड ६९ लाख, हिमालयन रि इन्स्योरेन्सको १० करोड ५२ लाख र हिमालयन डिष्टिलरीको १० करोड ९ लाख रुपैयाँको धितोपत्र कारोबार भएको छ । यस्तै सानिमा जिआईसी, जानकी फाइनान्स, नेपाल फाइनान्स, सिद्धार्थ प्रिमियमको प्रमोटर सेयर र सिईडिबी हाईड्रोपावरको सर्वाधिक कारोबार भएको छ ।

आज सबैभन्दा धेरै सिद्धार्थ प्रिमियर इन्स्योरेन्सको संस्थापक ३ लाख ६६हजार ५०० कित्ता सेयर कारोबार भएको छ भने हिमालयन रि इन्स्योरेन्सको १७९४ पटक सेयर कारोबार भएको छ।

हिमालयन डिष्टिलरीको सेयर मूल्य सर्वाधिक बढ्यो

हिमालयन डिष्टिलरीको सेयर मूल्य आज सर्वाधिक बढेको छ । हिमालयन डिष्टिलरीका लगानीकर्ताले आज ८.५४ प्रतिशतका दरले कमाएका छन् ।
यस्तै दोस्रोमा समाज लघुवित्तको सेयर मूल्य ६.९४ प्रतिशत, गुडबिल फाइनान्सको ५.७४ प्रतिशत, नेशनल हाइड्रोपावरको ५.५१ प्रतिशत र सनराइज ब्लूचिप फन्डको इकाई मूल्य ५.३६ प्रतिशतले बढेको छ ।

उपकार लघुवित्तको सर्वाधिक घट्यो

उपकार लघुवित्त वित्रीय संस्थाको सेयर मूल्य आज सर्वाधिक घटेको छ । प्रतिसेयर ६.४६ प्रतिशतले घटेसँगै लघुवित्तको मूल्य १८१५.६० रुपैयाँमा झरेको छ । यसैगरी हिमालयन उर्जा विकास कम्पनीको ६.२१ प्रतिशत, १०.५% नेपाल इन्भेष्टमेन्ट बैंक डिबेञ्चर २०८२ को ३.५१, १०.२५%प्राइम बैंक डिबेञ्चर २०८६ को ३.१८ प्रतिशत र बिन्दबासिनी हाइड्रोपावरको सेयर मूल्य २.१७ प्रतिशतले घटेको छ ।

मंगलबारको कारोबारपछि कुल बजार पुँजीकरण ३३ खर्ब ३० अर्ब ६६ करोड ८ लाख रुपैयाँमा समेटिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।