खराब कर्जा ह्वात्तै बढ्दा इन्भेष्टमेन्ट बैंकको प्रगतिमा अवरोध, प्रतिशेयर आम्दानीमा गिरावट

नेपाल इन्भेष्टमेन्ट बैंकले चालु आर्थिक बर्षको तेस्रो त्रैमासिक अवधिमा गत आव को यसै अवधिको तुलनामा नाफा घटेको वित्तीय विवरण सार्वजनिक गरेको छ ।

बैंकले यस अवधिमा २ अर्ब ५८ करोड खुद नाफा कमाएको छ । जुन गत आव को यसै अवधिको तुलनामा ९.६२ प्रतिशत कम हो । गत बर्षको यसै अवधिमा बैंकले २ अर्ब ८३ करोड नाफा गरेको थियो । बैंकको वितरण योग्य नाफा एक अर्ब ४३ करोड छ ।

खराब कर्जाको भार बढ्दा बैंकको संचालन नाफा, खुद नाफा घटेको छ । जसले गर्दा प्रतिशेयर आम्दानी समेत खस्किएको छ । यसअवधिमा बैंकको प्रतिशेयर आम्दानी २३ प्रतिशत बढीले खस्किएको छ । गत आवको तेस्रो त्रैमासमा ३५ रुपैयाँ ५५ पैसामा रहेको यस्तो आम्दानी चालु आवको तेस्रो त्रैमासमा २७ रुपैयाँ १७ पैसामा झरेको छ ।

बैंकले ९२ करोड ४० लाख रुपैयाँ जोखिम व्यवस्थापनमा राखेको छ । जसले गर्दा उसको खराब कर्जा ह्वात्तै बढेको छ । बैंकको खराब कर्जा ३०० प्रतिशतले बढेको छ । ०.७६ प्रतिशतमा रहेको खराबकर्जा चैतमसान्तसम्म ३.०४ प्रतिशत पुगेको छ ।

बैंकको निक्षेप तथा कर्जामा सामान्य सधुार देखिएको छ । चार प्रतिशतले निक्षेप बढाउदा बैंकको कर्जा करिब पाँच प्रतिशतले बढेको छ । बैंकले एक खर्ब ४२ अर्ब निक्षेप संकलन गरेर एक खर्ब २४ अर्ब कर्जा प्रवाह गरेको छ । यस अवधिमा बैंकको कर्जा निक्षेप अनुपात भने ७६.१९ प्रतिशत छ ।

कोषको लागत बढेपनि बैंकको खुद ब्याज आम्दानीमा भने करिब २० प्रतिशतको सुधार देखिएको छ । बैंकले यसअवधिमा खुद ब्याज आम्दानी बाट चार अर्ब १६ करोड आर्जन गरेको छ ।

१२ अर्ब ५८ करोड चुक्ता पूँजीको रहेको बैंकको जगेडाकोषमा १२ अर्ब ४८ करोड छ ।