फागुनमा पहुँच पुग्न बाँकी स्थानीय तहमा शाखा विस्तार हुन सकेन, पहुँच पुगेकै ठाउँमा थपिए ९० शाखा

हरेक स्थानीय तहमा वाणिज्य बैंकको शाखा सञ्जाल विस्तार गर्ने सरकारी नीति सार्थक हुने बाटोमा पुगेपनि फागुन महिनामा स्थानीय तहमा वाणिज्य बैंकको शाखा बढ्न नसकेको देखिएको छ।

चालु आर्थिक वर्षको ७ महिना अवधिमा कूल ७५३ स्थानीय तहमध्ये ७४६ तहमा वाणिज्य बैंकका शाखा विस्तार भई बैंकिङ्ग पहुँच कायम भएकोमा ८ औं महिनामा पनि ७४६ नै रहेको हो। यद्यपी शाखा नरहेका स्थानबाहेक अन्य पहुँच पुगेकै ठाउँमा ९० स्थानमा बैंक तथा वित्तीय संस्थानको शाखा विस्तार भएको केन्द्रीय बैंकको तथ्याङ्कमा देखिएको हो।

अब ७ स्थानीय तहमा मात्रै वाणिज्य बैंकको शाखा विस्तार हुन बाँकी रहेको छ। केन्द्रीय बैंकको अनुसार सुदूरपश्चिम र वाग्मती प्रदेशको दुई।दुई स्थान, तथा गण्डकी, कर्णाली र प्रदेश नम्बर १ को एक।एक स्थानीय तहमा वाणिज्य बैंकको शाखा सञ्जाल विस्तार हुन बाँकी रहेको हो। प्रदेश नम्बर २ (१३६ स्थानीय तह) र ५ को सबै (१०९) स्थानीय तहमा वाणिज्य बैंकको शाखा विस्तार भैसकेको छ ।

केन्द्रीय बैंकका अनुसार फागुन मसान्तसम्ममा वाणिज्य बैंक, विकास बैंक, वित्त कम्पनी, र लघुवित्तको गरि कूल १६२ वटा संस्थाले ९ हजार ६४० वटा शाखा मार्फत बैंकिङ्ग सेवा प्रवाह भएको छ। माघमा यस्तो संख्या ९ हजार ५५० वटा रहेकोमा फागुनमान ९० वटा शाखा विस्तार भएको हो। पूर्वाधार विकास बैंकको शाखा १ वटा छ।

जसमध्ये २७ वटा वाणिज्य बैंकको कूल शाखा संख्या ४ हजार २१९ वटा, २३ विकास बैंकको शाखा संख्या १ हजार २१३ वटा, २२ वित्त कम्पनीको २३३ वटा, ८९ वटा लघुवित्त संस्थाले ३ हजार ९६९ वटा शाखा सञ्जाल विस्तार गरेका छन्।