भारतले फेरि रोक्यो नेपालबाट निर्यात हुने पाम आयल

भारतले नेपालबाट निर्यात हुँदै आएको पाम आयलको आयात निर्यात पुन रोकेको छ। भारतको वैदेशिक व्यापार निर्देशनालयले आयातमा प्रतिबन्ध लगाएको हो। यसअघि गत जनवरी ८ देखि प्रतिबन्ध लगाएको थियो ।

यससँगै नेपालबाट भारत निर्यात हुने प्रशोधित पाम आयलको निर्यात मंगलबारदेखि पूर्ण रुपमा रोकिएको हो। निर्देशनालयले सोमबार मातहतका क्षेत्रीय निकायलाई सूचना पठाएर साफ्टा सुविधा अन्तर्गत नेपाल र बंगलादेशबाट हुने पाम आयल आयातमा प्रतिबन्ध लगाइएको बताएको हो ।

फागुनको दोस्रो साता नेपालबाट भारतका ३९ ओटा आयातकर्तालाई पाम आयल ल्याउन अनुमति दिएपछि निर्यात खुलेको थियो । भारतले निकासीमा रोक लगाएपछि नेपालबाट हुने वार्षिक २५ अर्बभन्दा बढीको निर्यात प्रभावित भएको छ।