राष्ट्रिय उपभोक्ता मञ्चद्धारा डीडीसी, डेरी उद्योग संघ तथा नेपाल डेरी एशोसियशनलाई कारबाहीको माग

राष्ट्रिय उपभोक्ता मञ्चले जथाभावी रुपमा दूधको मूल्य बढाइएको भन्दै डीडीसी, डेरी उद्योग संघ तथा नेपाल डेरी एशोसियशन विरुद्ध कारबाहीको माग गरेको छ ।

उपभोक्ता मञ्चले आइतबार एक प्रेस विज्ञप्ती जारी गर्दै डीडीसी, डेरी उद्योग संघ तथा डेरी एशोसियशन विरुद्ध विरोध जनाउँदै कारबाहीको माग गरेको हो ।

डीडीसीको गत बुधबार बसेको सञ्चालक समितिले बिहीबार पत्रकार सम्मेलन गर्दै शुक्रबारबाट लागू हुने गरी दुधको मूल्य प्रतिलिटर ९ रुपैयाँ बढाउने निर्णय गरेको थियो । तर उक्त निर्णय नितान्त गैरजिम्मेदार र बदनियतपूर्ण रहेको उपभोक्ता मञ्चले जनाएको छ ।

यस्तै मन्चले सरकारको निर्देशन भन्दा बढि मूल्य तोक्ने काम गरेकोमा संस्थानको व्यवस्थापन माथि आवश्यक कारवाही गरी पाउन नेपाल सरकार समक्ष माग गरेको छ ।

यस्तै दुध तथा दूधजन्य पदार्थमा सरकारको नीति निर्देशन विपरित निजी क्षेत्रका दुई संस्था डेरी उद्योग संघ तथा नेपाल डेरी एशोसियशनले सरकार र संस्थानले तोकेको मूल्य भन्दा बढी मूल्य तोकेको भन्दै आपति जनाएको छ ।

निजी डेरीले सरकार र संस्थानले तोकेको मूल्यमा पनि १ रुपैयाँ थप गरी १० रुपैयाँ प्रतिलिटर मूल्य बढाउने भनि सार्वजनिक रुपमा निर्णय गरेपछि उपभोक्ता मञ्चले विरोध जनाएको हो ।

डेरी संघ तथा एशोसियशनले कृषि तथा सहकारी मन्त्रालयले डीडीसीलाई प्रशोधित दूधको मूल्य निर्धारण गर्न जिम्मेवारी दिएको थियो । सोही अनुसार निर्णय भएकोमा उक्त मूल्यमा असहमति जनाउँदै आजबाट लागू हुने गरी नेपाल डेरी संघ र नेपाल डेरी एशोसियशनले दुधको मूल्य प्रतिलिटर १० रुपैयाँ बढाउने निर्णय गरेका थिए ।

उपभोक्ता मञ्चले विचौलियाहरुको दबाबमा गरिएको यो मूल्यवृद्धिको पूर्णतः विरोध गर्दै बढाएको मूल्य स्पष्ट रुपमा सर्वसाधारण किसानले पाउने ग्यारेण्टी गर्न र किसानले उचित रकम नपाएको अवस्थामा बढेको मूल्य भुक्तानी नगर्ने व्यवसायी माथि समेत कानूनी कारवाही गर्न समेत माग गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।