पाइपलाइनमा रहेका २५ जलविद्युत कम्पनीलाई तत्काल आइपिओ निष्कासनको अनुमति दिन इप्पानको माग

स्वतन्त्र उर्जा उत्पादकहरुको संस्था नेपाल (ईप्पान) ले आइतबार नेपाल धितोपत्र बोर्डका अध्यक्ष रमेशकुमार हमालसँग भेटेर २५ ओटा जलविद्युत कम्पनीहरुको आइपिओ निष्कासनको अनुमतिको कार्य तत्काल अगाडि बढाउन लिखित माग गरेको छ ।

आइपीको अनुमतिका लागि सेबनमा आवेदन दिएर पाइपलाइनमा रहेका २५ ओटा जलबिद्युत कम्पनीहरुको सम्बन्धमा सेबनले लामो समय भइसक्दा पनि अनुमति नदिएपछि नवनियुक्त अध्यक्ष हमालसँग भेट गरी यस्तो माग गरेको ईप्पानले जनाएको छ ।

पाइपलाइनमा रहेका जलबिद्युत कम्पनीहरुलाई आइपीओको तत्काल अनुमति दिन लिखित माग लिएर इप्पानका तर्फबाट कार्यसमिति सदस्य उत्तम ब्लोन लामा र प्रकाशचन्द्र दुलाल एक दर्जनभन्दा बढी उर्जा उद्यमीसहित सेबनको कार्यालय खुमलटार पुगेका थिए ।

उनीहरुले आइपीओ जारी नहुँदा रकम अभाव भई निर्माणाधीन आयोजनााहरुको कार्य ठप्प हुन थालेको र निर्माणको अन्तिम चरणमा रहेका आयोजनाहरुको समेत रकम अभावका कारण काम रोक्नुपर्ने अवस्था श्रृजना भएको पनि अध्यक्ष हमाललाई जानकारी गराए । आयोजनाहरुको काम यसरी प्रभाबित हुँदा लागत बढ्न गई अन्ततः आयोजनाहरु नै सम्पन्न गर्न नसकिने समस्या तथा चुनौतिहरु थपिदै जाने संकेत देखिन थालेको सेबनलाई इप्पानले दिएको निबेदनमा उल्लेख गरेको छ ।

त्यस्तै आयोजना समयमै सम्पन्न हुन नसक्दा देशलाई १० बर्षमा १५ हजार मेगावाट बिजुली उत्पादन गर्ने राष्ट्रिय लक्ष्यमा समेत गम्भीर धक्का लाग्ने, राज्य र लगानीकर्ताहरुको अर्बांै रुपैयाँको नोक्सानी हुने र यसबाट बैंक तथा वित्तीय संस्थाहरु पनि गम्भीररुपले प्रभाबित इप्पानले उल्लेख गरेको छ ।

ईप्पान र उर्जा उद्यमीहरुको धारणा सुनेपछि सेवनका नवनियुक्त अध्यक्ष हमालले सेबन र पुँजी बजारको सुधारका लागि आफ्नो कार्यकाल कार्यक्षमता पूर्णरूपमा प्रयोग गर्ने बताउँदै जलबिद्युत क्षेत्रको ईपीओको समस्या तत्काल समाधान गर्ने पनि प्रतिबद्धता जनाए । पुँजीबजारको बिकास, बिस्तार र बिस्वानियताका लागि जलबिद्युत क्षेत्रको साथ र सहयोग आवश्यक हुने भन्दै उनले यो क्षेत्रको निरन्तर सहयोग आग्रहसमेत गरे ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।