नक्कली भ्याट बिल बनाएर राजश्व छल्ने तीन विरुद्ध १६ करोडको मुद्दा

राजस्व अनुसन्धान विभागले मूल्य अभिवृद्धि विजक जारी गरेर कर छली गर्ने सौगात इन्टरनेशनलका सञ्चालक विरुद्ध १६ करोड ४३ लाख रुपैयाँ बराबरको विगो र सजायको माग दाबी सहित मुद्दा दायर गरेको छ ।

विभागले गरेको अनुसन्धानबाट उक्त फर्मले आयकर ऐन तथा मूल्य अभिवृद्धि कर ऐन तथा नियमहरु बमोजिम तिर्नुपर्ने कर नतिरी राजस्व चुहावटको गरेको पुष्टि भएपछि चैत २ गते बुधबार मुद्दा उच्च अदालत पाटन, ललितपुरमा मुद्दा दायर गरेको हो ।

उक्त फर्मले राजस्व चुहावट गर्ने मनसायले जालसाजीयूक्त, नक्कली तथा झुट्टा मूल्य अभिवृद्धि विजक लिई वित्तीय विवरणहरु तथा आय विवरणहरु तयार गरी मूल्य अभिवृद्धि तर्फ क्रेडिट दाबी गरी तिर्नुपर्ने भ्याट नितिरे र आयकर तर्फ लागत खर्च दाबी गरी आयकर समेत चुहावट गरेको विभागले जनाएको छ ।

उक्त फर्मले भ्याटतर्फ २ करोड ५२ लाख ५४ हजार र आयकर तर्फ ५ करोड ६९ हजार ५८ हजार गरी कुल ८ करोड २१ लाख २१ हजार ६४१ रुपैयाँ राजस्व चुहावट गरेको पुष्टि हुन आएको जनाएको छ ।

राजस्व चुहावट (अनुसन्धान तथा नियन्त्रण) (पहिलो संशोधन) ऐन, २०५२ दफा २३ (१) बमोजिम प्रतिवादीहरु दिपक कुमार देउजा र मोहन प्रसाद भट्टराईसँग विगो असूल उपर गरी विगोको शतप्रतिशत जरिवाना र त्यति नै विगो सहित कुल १६ करोड ४३ लाख ४५ हजार रुपैयाँ असुल उपर गर्न माग गरिएको छ ।

यस्तै लेखापरीक्षक सुनिलमान शाक्यको हकमा राजस्व चुहावट (अनुसन्धान तथा नियन्त्रण) (पहिलो संशोधन) ऐन, २०५२ दफा २३ को उपदफा (३) बमोजिम मतियारलाई हुने सजाय हुने मागदाबी लिई अभियोग पत्र दायर गरिएको छ ।

उक्त फर्मका प्रोपराइटर दिपक कुमार देउजा, खाता सञ्चालक मोहन प्रसाद भट्टराई र लेखापरीक्षक सुनिलमान शाक्यलाई विपक्षी बनाएर मुद्दा चलाएको हो । प्रोपराइटर देउजा भक्तपुर जिल्ला सूर्यबिनायक नगरपालिका वठा नम्बर १० देउजागाँउ, भट्टराई चितवन कालिका नगरपालिका वडा नम्बर ५ र लेखापरीक्षक शाक्य काठमाडौं महानगरपालिका वडा नम्बर २१ लगनटोलका स्थायी बासिन्दा हुन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।