अमेरिकाले भारी मात्रामा कच्चा तेल रिलिज गर्दा घट्यो अन्तर्राष्ट्रिय बजारमा मूल्य

अमेरिकी राष्ट्रपति जो वाइडेनले आकासिएको कच्चा तेलको मूल्य नियन्त्रण गर्न कैयौं महिनासम्म प्रतिदिन १० लाख ब्यारल रिलिज गर्ने भएका छन् ।

बाइडेनको यो कदमले अन्तर्राष्ट्रिय बजारमा ५ डलर प्रति ब्यारलले तेलको मूल्यमा कमी आएको छ ।

हप्ताको सुरुवातमा करिब १२० डलर प्रति ब्यारलमा कारोबार गरेको ब्रेन्ट क्रुडले आज १०८.५८ डलर प्रति ब्यारलमा कारोबार गरिरहेको छ ।

यसैगरी साताको सुरुवातमा डलर प्रति ब्यारलमा कारोबार गरिरहेको वेष्ट टेक्सास इन्टरमिडियट (डब्लुटी आइ) ले आज १०२.७४ डलर प्रति ब्यारलमा कारोबार गरेको छ ।

बाइडेनले आज पेट्रोलियम पदार्थको मूल्य वृद्धि कसरी घटाउन सकिन्छ भन्ने रणनीतिको बारेमा प्रस्ट पार्ने छन् । रुस–युक्रेन युद्धका कारण आकासिएको कच्चा तेलको मूल्यमा अहिले ३ प्रतिशतले गिरावट आएको छ ।

यसै सन्दर्भमा एसपीआई एसेट व्यवस्थापनका व्यवस्थापक स्टेफेन इनेसले, “इन्धन मूल्य नियन्त्रण गर्न रिजर्भबाट तेल रिलिज गर्नु भनेको अस्थायी समाधान हो । यो भाँचिएको खुट्टामा ब्यान्डेज लगाउनु जस्तै हो । ” भनेर बताएका छन् ।

मार्च महिनाको सुरुवातमा बाइडेन प्रशासनले ३० मिलियन ब्यारल रिलिज गर्ने बताएको थियो । विभिन्न देशहरुले बढ्दो कच्चा तेलको मूल्य नियन्त्रण गर्न ६० मिलियन ब्यारल प्रति दिन रिलिज गर्ने सम्झौता गरेका छन् ।

यसैबीच रुसी राष्ट्रपति भ्यादिमिर पुटिनले अघि सारेको रुबल मै इन्धनको मूल्य तिर्नुपर्ने सम्झौतालाई जर्मनले अस्वीकार गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।