वाणिज्य बैंकहरुको खराब कर्जा औषतमा १.२७ प्रतिशत, सरकारी स्वामित्वका बैंकमा धेरै

वाणिज्य बैंकहरुको औषत खराब कर्जा अनुपात १.२७ प्रतिशत रहेको देखिएको छ । सञ्चालनमा रहेका २७ वाणिज्य बैंकहरुले प्रकाशन गरेको वित्तीय विवरणका आधारमा यस्तो तथ्याङ्क देखिएको हो ।

साउनदेखि चैतसम्म आइपुग्दा बैंकहरुको कुल कर्जा लगानी ४० खर्ब १५ अर्ब ९९ करोड ५४ लाख ९२ हजार रुपैयाँ बराबरको कर्जा प्रवाह गरेका छन् । प्रति बैंक औषतमा १ खर्ब ४८ अर्ब ७४ लाख रुपैयाँ बराबरको रहेको छ । यस आधारमा वाणिज्य बैंकहरुमा मात्रै ५१ अर्ब रुपैयाँ बराबरको खराब कर्जा रहेको देखिन्छ ।

वित्तीय विवरण अनुसार सरकारी स्वामित्वका वाणिज्य बैंकहरुमा खराब कर्जा अनुपात धेरै रहेको छ । राष्ट्रिय वाणिज्य बैंकमा सबैभन्दा धेरै कुल कर्जा लगानीको ३.०७ प्रतिशत खराब कर्जा रहेको छ भने कृषि विकास बैंकमा २.३२ प्रतिशत अनुपातमा खराब कर्जा रहेको छ । अर्को सरकारी बैंक नेपाल बैंकमा २.०६ प्रतिशत खराब कर्जा अनुपात छ ।

निजी बैंकतर्फ सबैभन्दा धेरै खराब कर्जा अनुपात नेपाल बंगलादेश बैंकमा २.३० प्रतिशत रहेको छ भने नेपाल इन्भेष्टमेन्ट बैंकमा २.२० प्रतिशत रहेको छ । यी बैंकहरु खराब कर्जा अनुपातमा क्रमशः तेस्रो र चौंथो नम्बरमा रहेका छन् ।

थप ११ वाणिज्य बैंकको खराब कर्जा अनुपात १ प्रतिशतभन्दा धेरै २ प्रतिशतभन्दा कम रहेको छ । यस अवधिमा सिटिजन्स, सेञ्चुरी कमर्सियल, एनसीसी, एनएमबि, ग्लोबल आइएमई, बैंक अफ काठमाण्डू, सनराइज, प्रभु, नबिल, सिद्धार्थ र लक्ष्मी बैंकको खराब कर्जा अनुपात १ प्रतिशतभन्दा धेरै छ ।

सिभिल बैंक, हिमालयन, कुमारी, प्राइम कमर्सियल, माछापुच्छ्रे, मेगा, एनआईसी एशिया, सानिमा, स्ट्याण्डर्ड चार्टड, एभरेष्ट र नेपाल एसबिआई बैंकको बैंकको खराब कर्जा अनुपात १ प्रतिशतभन्दा कम रहेको छ । नेपाल एसबिआई बैंकको खराब कर्जा अनुपात सबैभन्दा थोरै ०.१४ प्रतिशत रहेको छ । एसबिआईले चैतसम्म १ खर्ब ८ अर्ब ४७ करोड रुपैयाँ कर्जा लगानी गरेकोमा बैंकमा १५ करोड १८ लाख रुपैयाँ रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।