चौध विकास बैंकको नाफा ५ अर्ब २० करोड, मुक्तिनाथले सर्वाधिक कमाउँदा महालक्ष्मीले धेरै बढायो

चालु आर्थिक वर्ष २०७८/७९ को तेस्रो त्रैमाससम्ममा वित्तीय विवरण प्रकाशन गरेका १४ विकास बैंकहरुले ५ अर्ब २० करोड ६१ लख ६३ हजार रुपैयाँ खुद नाफा आर्जन गरेका छन् ।

अघिल्लो आव २०७७।७८ को ९ महिना अवधिमा यी बैंकहरुको खुद नाफा ४ अर्ब ७८ करोड ३६ लाख ४५ हजार रुपैयाँ रहेको थियो । समीक्षा अवधिमा बैंकहरुको नाफा औषतमा ८.८३ प्रतिशतले बढेको हो ।

यस अवधिमा सबैभन्दा धेरै महालक्ष्मी विकास बैंकले ७७ प्रतिशतले खुद नाफा बढाएको छ । ग्रीन डेभलपमेन्ट बैंक २३, सिन्धु विकास बैंक २१, लुम्बिनी विकास बैंक २०, गरिमा विकास बैक पौने १६, सांग्रिला डेभलपमेन्ट बैंक १४, साइन रेसुङ्गा डेभलपमेन्ट बैंक ८ र मुक्तिनाथ विकास बैंकले डेढ प्रतिशतले नाफा बढाएको छ । समीक्षा अवधिमा ८ बैंकले नाफा बढाउँदा ६ बैंकको नाफा भने घटेको छ ।

उता कर्पोरेट डेभलपमेन्ट बैंकको खुद नाफा अघिल्लो चैतको तुलनामा सबैभन्दा धेरै साढे ६३ प्रतिशतले घटेको छ । ज्योति विकास बैक १४, कामना सेवा विकास बैंक १४, एक्सेल डेभलपमेन्ट बैंक १० र मितिेरी डेभलपमेन्ट बैंकको खुद नाफा १ प्रतिशतले घटेको हो । नारायणी डेभलपमेन्ट बैंकको नाफा ऋणात्मक रहेपनि केही सुधारिएको छ । बैंकको नोक्सानी ६० प्रतिशतले सुधारिएको हो ।

खुद नाफामा मुक्तिनाथ सबैभन्दा अगाडि, नारायणी नोक्सानीमा

विसं २०७८ चैतसम्म मुक्तिनाथ विकास बैंकले सबैभन्दा धेरै १ अर्ब २ करोड ६ लाख रुपैयाँ खुद नाफा कमाउँदै सबैभन्दा अगाडि रहेको छ । मुक्तिनाथ विकास बैंकले चालु आवको ९ महिनामा चार वाणिज्य बैंकहरुभन्दा धेरै नाफा गरेको हो ।

यस अवधिमा नारायणी डेभलपमेन्ट बैंक २१ लाख ९ हजार रुपैयाँ नोक्सानीमा रहेको छ । अघिल्लो आवको चैतमा ५२ लाख ५४ हजार नोक्सानीमा रहेको बैंकको नोक्सानी ६० प्रतिशत अर्थात ३१ लख ४५ हजारले सुधारिएको हो ।

विकास बैंकहरुमा खुद नाफामा गरिमा विकास बैंक दोस्रो नम्बरमा रहेको छ । बैंकले चालु आवको ९ महिना अवधिमा ७८ करोड ४६ लाख ९० हजार रुपैयाँ खुद नाफा आर्जन गरेको हो ।

सबैभन्दा धेरै नाफा बढाएको महालक्ष्मी विकास बैंक नाफाका आधारमा तेस्रो नम्बरमा रहेको छ । चैत मसान्तसम्म महालक्ष्मीले ७१ करोड ४२ लाख ८५ हजार रुपैयाँ खुद नाफा कमाएको छ । ज्योति विकास बैंकले ५१ करोड ५७ लाख, लुम्बिनी विकास बैंकले ५१ करोड ६ लाख र कामना सेवा विकास बैंकले ५० करोड ४५ लाख ३३ हजार रुपैयाँ खुद नाफा कमाएको छ । अन्य बैंकको नाफा ५० करोडभन्दा कम छ ।

यस अवधिमा शाइन रेसुङ्गा ४८ करोड ४७ लाख, सांग्रिला डभेलपमेन्ट बैंक ४० करोड ६ लाख, मितेरी डेभलपमेन्ट बैंक १० करोड ६० लाख, एक्सेल डेभलपमेन्ट बैंक १० करोड ५८ लाख नाफा आर्जन गरेको छ ।

यस्तै सिन्धु विकास बैंकले ४ करोड ३३ लाख, ग्रीन डेभलपमेन्ट बैंकले ९५ लाख ७५ हजार, कर्पोरेट डेभलपमेन्ट बैंकले ७५ लाख २३ हजार रुपैयाँ खुद नाफा आर्जन गरेको छ । नारायणी डेभलपमेन्ट बैंक भने २१ लाख ९ हजार नोक्सानीमा रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।