निर्जीवन बीमा व्यवसाय २५% ले बढ्यो, चैतसम्म २८.७० अर्ब बीमाशुल्क संकलन

मुलुकमा सञ्चालित २० वटा निर्जीवन बीमा कम्पनीहरुको बीमा व्यवसाय २५ प्रतिशतले बढेको छ ।  बीमा समितिले उपलब्ध गराएको तथ्यांक अनुसार चालु आर्थिक वर्ष २०७८/७९ को तेस्रो त्रैमाससम्म २८ अर्ब ७० करोड ११ लाख ७० हजार रुपैयाँ कुल बीमा शुल्क संकलन गरेका छन् ।

विसं २०७७ चैत मसान्तसम्मको तुलनामा चालु आवको यसै अवधिमा २४.६८ प्रतिशत बढेको हो । विसं २०७७ चैतसम्ममा निर्जीवन बीमा कम्पनीहरुले २३ अर्ब २ करोड रुपैयाँ कुल बीमाशुल्क आर्जन गरेका थिए ।

यस अवधिमा शिखर इन्स्योरेन्सले सबैभन्दा धेरै ३ अर्ब ७१ करोड १५ लाख रुपैयाँ बीमाशुल्क संकलन गरेको छ । अघिल्लो आवको यसै अवधिमा शिखर इन्स्योरेन्सले २ अर्ब ९६ करोड रुपैयाँ कुल बीमाशुल्क संकलन गरेको थियो ।

दोस्रो ठूलो बीमाशुल्क संकलन गरेको सगरमाथा इन्स्योरेन्सले २ अर्ब ४२ करोड ९२ लाख ५० रुपैयाँ बीमाशुल्क संकलन गरेको छ भने तेस्रो ठूलो नेको इन्स्योरेन्सले २ अर्ब २३ करोड ९३ लाख रुपैयाँ बीमाशुल्क संकलन गरेको छ । विसं २०७७ चैतमा सगरमाथा इन्स्योरेन्सको कुल बीमाशुल्क १ अर्ब ९९ करोड र नेको इन्स्योरेन्सको १ अर्ब ९५ करोड रुपैयाँ रहेको थियो । सिद्धार्थ इन्स्योरेन्सले १ अर्ब ९४ करोड ५ लाख, एनएलजी इन्स्योरेन्सले १ अर्ब ७७ करोड १८ लाख, प्रिमियर इन्स्योरेन्सले १ अर्ब ६४ करोड ६ लाख, राष्ट्रिय बीमा कम्पनीले १ अर्ब ४२ करोड ९६ लाख रुपैयाँ कुल बीमाशुल्क संकलन गरेको छ ।

शिखर इन्स्योरेन्सले आफ्नो अग्रतालाई कायमै राख्न सफल भएको छ । चालु आर्थिक वर्षको चैतसम्ममा कुल बीमा शुल्क संकलनमा शिखर एक्लैको करिब १३ प्रतिशत हिस्सा छ । सगमाथा इन्स्योरेन्सको ८.४६, नेको इन्स्योरेन्सको ६.८०, सिद्धार्थ इन्स्योरेन्स ६.७६, एनएलजी इन्स्योरेन्स ६.१७ प्रतिशत, प्रिमियर इन्स्योरेन्सको ५.७२ र राष्ट्रिय बीमा कम्पनीको कुल बीमा शुल्क संकलनमा ५ प्रतिशत हिस्सा रहेको छ ।

यसैगरी २०७८ चैतसम्ममा युनाइटेड इन्स्योरेन्सले १ अर्ब २१ करोड ३५ लाख, हिमालयन जनरल इन्स्योरेन्सले १ अर्ब २६ करोड ५२ लाख, अजोड इन्स्योरेन्सले १ अर्ब २२ करोड ६६ लाख, नेपाल इन्स्योरेन्सले १ अर्ब १८ करोड ९१ लाख, लुम्बिनी जनरल इन्स्योरेन्सले १ अर्ब १७ करोड ७९ लाख, आइएमई जनरल इन्स्योरेन्सले १ अर्ब २७ करोड ४१ लाख, प्रभु इन्स्योरेन्सले १ अर्ब १० करोड ६४ लाख, प्रुडेन्सियल इन्स्योरेन्सले १ अर्ब १० लाख र दि ओरियन्टल इन्स्योरेन्सको १ अर्ब ३ करोड ४९ लाख रुपैयाँ कुल बीमाशुल्क संकलन गरेको छ ।

समीक्षा अवधिमा एभरेष्ट इन्स्योरेन्सले ९२ करोड ७४ लाख, जनरल इन्स्योरेन्स कम्पनीले ७२ करोड २४ लाख, सानिमा जनरल इन्स्योरेन्सले ७२ करोड ६ लाख र नेशनल इन्स्योरेन्सले सबैभन्दा कम ६७ करोड ८८ लाख रुपैयाँ कुल बीमशुलक संकलन गरेको छ ।

बीमा समितिका अनुसार चालु आर्थिक वर्ष २०७८/७९ को तेस्रो त्रैमाससम्ममा २० निर्जीवन बीमा कम्पनीहरुले २१ लाख ७५ हजार ४१४ वटा बीमालेख जारी गरेका छन् ।

प्रभु र प्रुडेन्सियलको बीमाशुल्क संकलन घट्यो, सानिमा जनरलको उच्च वृद्धि

चैतसम्ममा निर्जीवन बीमा कम्पनीहरुले करिब २८ अर्ब ७० करोड रुपैयाँ कुल बीमा शुल्क संकलन गरेका छन् । जसमा प्रभु इन्स्योरेन्स र प्रुडेन्सियलको व्यवसाय खस्किँदा अन्य १८ कम्पनीहरुले भने सुधार गरेका छन् ।

चालु आर्थिक वर्षको नौ महिना चैतसम्ममा गत आवको यसै अवधिको तुलनामा प्रभु इन्स्योरेन्स सबैभन्दा धेरै ५.५६ प्रतिशतले बीमाशुल्क संकलन घटेको छ । प्रुडेन्सियल इन्स्योरेन्सको पनि ३.७९ प्रतिशतले घटेको छ ।

समीक्षा अवधमिा चार निर्जीवन बीमा कम्पनीले गत आवको तेस्रो त्रैमासको तुलनामा चालु आवको यसै अवधिमा ३० प्रशितभन्दा बढीले बीमाशुल्क संकलनलाई वृद्धि गरेका छन् । सानिमा जनरलले यस अवधिमा सर्वाधिक ५६.६६ प्रतिशतले बीमाशुल्क संकलन बढाउँदा युनाइटेड इन्स्योरेन्सले ४६.२१ प्रतिशत, जनरल इन्स्योरेन्सले ३८.९३ प्रतिशत, हिमालयन जनरल इन्स्योरेन्सले ३९.०४ प्रतिशतले कुल बीमाशुल्क संकलन वृद्धि गरेको छ । यस्तै गत चैतको तुलनामा दि ओरियन्टल इन्स्योरेन्सको २७.७७ प्रतिशत, शिखर इन्स्योरेन्स २५.३९, अजोड इन्स्योरेन्स २३.९१, नेपाल इन्स्योरेन्स २३.८६, सगरमाथा इन्स्योरेन्स २२.०७ प्रतिशतले कुल बीमाशुल्क संकलन बढेको छ ।

एभरेष्ट इन्स्योरेन्स, प्रिमियर इन्स्योरेन्स, लुम्बिनी जनरल इन्स्योरेन्स, नेको इन्स्योरेन्स, आईएमई जनरल इन्स्योरेन्स र सिद्धार्थ इन्स्योरेन्सको कुल बीमाशुल्क दशदेखि २० प्रतिशतसम्म बढेको छ ।

विसं २०७७ चैतको तुलनामा एभरेष्ट इन्स्योरेन्सले १८.९० प्रतिशत, प्रिमियर इन्स्योरेन्सले १८.०३, लुम्बिनी जनरल इन्स्योरेन्सले १६.६३, नेको इन्स्योरेन्सले १४.८४, आईएमई जनरल इन्स्योरेन्सले ११.७७ र सिद्धार्थ इन्स्योरेन्सले १०.८९ प्रतिशतले कुल बीमाशुल्क संकलनत वृद्धि गरेको छ । यस अवधिमा एनएलजी इन्स्योरेन्सले ४.८४ प्रतिशत र नेशनल इन्स्योरेन्सले १.३२ प्रतिशतले बीमाशुल्क संकलन बढाएको छ ।

राष्ट्रिय बीमा कम्पनीले भने विसं २०७७ चैतको तथ्याङ्क उपलब्ध नगराएका कारण कम्पनीको बीमाशुल्क संकलन बढ्यो वा घट्यो यकिन छैन ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।