संकट हल गर्नभन्दा सरकार तमासा हेरर बस्दा देश श्रीलंका बन्ने हो कि भन्ने त्रास बढ्योः खतिवडा

पूर्वअर्थमन्त्री डा. युवराज खतिवडाले नेपालको अर्थतन्त्रमा देखिएको संकट हल गर्ने भन्दा पनि सरकारले तमासा हेरेर बसेकाले कतै श्रीलंका नै बन्ने हो की भन्ने मनोवैज्ञानिक त्रास बढेको बताएका छन् ।

शनिबार काठमाडौंमा मदन भण्डारी बौद्धिक मञ्चद्वारा आयोजित संकटोन्मुख अर्थतन्त्र र आगामी आर्थिक वर्ष २०७९/८० को बजेट विषय अन्तरक्रिया कार्यक्रममा बोल्दै पूर्वअर्थमन्त्री खतिवडाले यस्तो बताएका हुन् ।

कार्यक्रममा पूर्वमन्त्री खतिवडाले नेपालको अवस्था श्रीलंकाकै जस्तो नभए पनि सरकारले सुधारको लक्षण नदेखाउँदा थप चिन्ता बढेको बताए । निर्माण सामग्री, पेट्रोलियम पदार्थ, बैंकको ब्याजदर, यातायात ढुवानी भाडा समेत बढ्दै गएकाले अर्थतन्त्रमा चुनौती थपिँदै जाने उनले बताए ।

नेपालको अर्थतन्त्रको अवस्था वास्तवमै राम्रो नभएको भन्दै खतिवडाले बोल्ने भन्दा पनि संयमता अपनाउन आवश्यक रहेको उल्लेख गरे । सरकारले बजेटमा मनमा आएका सबै कुराहरु राखेको उनको आरोप छ । असम्भव र नमिल्दा कुराहरु राखेर बजेट लोकप्रिय बनाउन खोजेको उनको भनाई छ ।

बजेट मार्फत लिइएको ८ प्रतिशतको आर्थिक वृद्धि र मूल्यवृद्धि ७ प्रतिशतको सीमाभित्र राख्न तथा पाँच वर्षमा व्यापार सन्तुलन कायम गरेर देखाउन उनले सरकारलाई चुनौती दिए । आर्थिक वृद्धिदर ५ प्रतिशत माथि जानेबित्तिकै व्यापार घाटामा दबाब पर्ने अवस्था रहेको उनले बताए ।

डा. खतिवडाले आर्थिक वृद्धि गरेर मुलुकले निर्यात गर्न नसके शोधानान्तर घाटा बढ्ने र शोधानान्तर घाटा हुँदा पुनःअर्थतन्त्र भयावह हुने भन्दै सरकार अहिले त्यही बिन्दुमा रहेको जिकिर गरे । आगामी आर्थिक वर्षमा ८ प्रतिशतको आर्थिक वृद्धि पुग्ने अवस्था आयो भने बाह्य क्षेत्र असन्तुलन अहिलेको भन्दा दोब्बर खराब हुँदै जाने भन्दै उनले सरकारले यो कुरामा हेक्का राख्नुपर्ने बताए ।

कालोबजारी र पुँजी पलायनमा पैसा हराएर बैंकहरुमा नफर्किएकाले बजारमा तरलता अभावको समस्या भएको बताउँदै उनले मुलुकमा ११० प्रतिशतसम्म कर्जा विस्तार भएर मात्रै बजार तरलता अभाव नभएको बताए । पूर्वमन्त्री खतिवडाले तरलता समस्या विषयमा अर्थ मन्त्रालय, राष्ट्र बैंक, राजस्व अनुसन्धान र गृह मन्त्रालयले अध्ययन गर्नुपर्ने बताए ।

कार्यक्रममा नेपाल राष्ट्र बैंकका कार्यकारी निर्देशक डा. प्रकाश श्रेष्ठले बाह्य क्षेत्र, मूल्य वृद्धि र बैंक तथा वित्तीय संस्थाको व्याजदर वृद्धिले अर्थतन्त्रमा समस्या सृजना गरेको भन्दै अर्थतन्त्रमा देखिएको संकट तत्काल हल हुने सम्भावना नरहेको प्रष्ट पारे ।

अर्थशास्त्रीहरु डा. गोविन्द नेपाल र डा. दिलनाथ दंगालले वित्तीय क्षेत्र, मौद्रिक क्षेत्र, बाह्य क्षेत्र र आर्थिक वृद्धि एकै पटक चार क्षेत्र ओरालो लाग्नु गम्भीर भए पनि सुधारका लागि सरकार खासै गम्भीर नबनेको आरोप लगाए ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।