खुद नाफामा ३१ लघुवित्तमा कुनको स्थान कहाँ ?

साउन २० गते शुक्रबारसम्म सूचीकृत ३१ लघुवित्त कम्पनीले गत आर्थिक वर्ष २०७८।७९ को चौथो त्रैमासिक वित्तीय विवरण सार्वजनिक गरेका छन् ।

जसमध्ये छिमेक लघुवित्तले सबैभन्दा धेरै १ अर्ब ३ करोड रुपैयाँ खुद नाफा आर्जन गर्दै वार्षिक प्रतिसेयर आम्दानी ४४.४१ रुपैयाँ कायम गरेको छ ।

यस अवधिमा जीवन विकास लघुवित्तले ७८ करोड १९ लाख ३७ हजार रुपैयाँ खुद नाफा कटाउँदा एनआईसी एशिया लघुवित्तले ५८ करोड ५६ लाख ३४ हजार रुपैयाँ खुद नाफा आर्जन गरेको छ ।

यस्तै आरएमडिसीको खुद नाफा ३५ करोड ४९ लाख, फस्ट माइक्रोफाइनान्स २६ करोड ८८ लाख, ग्लोबल आइएमई लघुवित्त २५ करोड ५ लाख, नेरुडे लघुवित्त २३ करोड ३० लाख, नेष्डो समृद्ध लघुवित्त २२ करोड १९ लाख र मिर्मिरे लघुवित्तले २० करोड ८१ लाख खुद नाफा कमाएको छ ।

थप २२ लघुवित्तमध्ये दश लघुवित्तले दश करोडदेखि २० करोडको बीचमा र बाह्र लघुवित्तको खुद नाफा दश करोडभन्दा कम छ । सबैभन्दा कम नाफा गुराँस लघुवित्तले गरेको छ । गुराँस लघुवित्तले १ करोड २७ लाख ४७ हजार रुपैयाँ मात्र खुद नाफा कमाएको हो ।

महिला लघुवित्तको प्रतिसेयर आम्दानी एक सय रुपैयाँमाथि

वित्तीय विवरण सार्वजनिक भएकामध्ये महिला लघुवित्तको प्रतिसेयर आम्दानी एक सय रुपैयाँमाथि रहेको छ । १५ करोड रुपैयाँ खुद नाफा आर्जन गरेको कम्पनीको पुँजी कम हुँदा इपिएस उच्च देखिएको हो ।

नेष्डो समृद्ध लघुवित्तको ८७.०३ रुपैयाँ, जीवन विकास लघुवित्त ७५.६०, उपकार लघुवित्तको ६८.०९, सिवाईसी नेपाल लघुवित्त ६६.०३ र जाल्पा लघुवित्तको इपिएस ६१.६६ रुपैयाँ रहेको छ । थप २० लघुवित्तको इपिइस २० देखि ४६ रुपैयाँ बीचमा रहँदा पाँच कम्पनीको दशदेखि २० रुपैयाँ बीचमा रहेको छ ।

सबैभन्दा कम इपिएस गणपति माइक्रोफाइनान्सको १२.२८ रुपैयाँ मात्र रहेको छ । लघुवित्तले गत आवमा १ करोड ८६ लाख १६ हजार रुपैयाँ खुद नाफा आर्जन गरेको हो ।

? समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।