फाइनान्सहरुको खराब कर्जा अनुपात औसतमा साढे ३ प्रतिशत, अघिल्लो वर्षभन्दा २.३९% घट्यो

फाइनान्स कम्पनीको खराब कर्जा अनुपात गत आर्थिक वर्ष २०७८/७९ मा २.३९ प्रतिशतले घटेको छ ।

अघिल्लो आवमा फाइनान्स कम्पनीको खराब कर्जा अनुपात औसतमा ५.८९ रहेकोमा गत आवमा घटेर ३.५० प्रतिशतमा झरेको छ ।

गत आवमा सञ्चालनमा रहेका १५ फाइनान्स कम्पनीमध्ये दश कम्पनीको खराब कर्जा अनुपात अघिल्लो आवको तुलनामा घटेको छ भने पाँच कम्पनीको भने बढेको छ ।

गत आवमा नेपाल फाइनान्सको खराब कर्जा अनुपात सबैभन्दा धेरै १४.०७ प्रतिशत रहेको छ । अघिल्लो आवमा ४४.८२ प्रतिशत रहेको फाइनान्सले एक वर्षमा ३.७५ प्रतिशत बिन्दुले खराब कर्जा अनुपात घटाएको हो ।

यसैगरी जानकी फाइनान्सको ७.८३ प्रतिशत, गोर्खाज फाइनान्स ७.५२ र समृद्धि फाइनान्सको खराब कर्जा अनुपात ४.५८ प्रतिशत रहेको छ । सेन्ट्रल फाइनान्स, रिलायन्स फाइनान्स, गुडविल फाइनान्स, बेष्ट फाइनान्स र मञ्जुश्री फाइनान्सको खराब कर्जा अनुपात २ देखि ३ प्रतिशत बीचमा रहेको छ ।

एक प्रतिशतभन्दा कम खराब कर्जा अनुपात हुने फाइनान्सको संख्या चार रहँदा एक देखि २ प्रतिशतबीचमा खराब कर्जा अनुपात हुने फाइनान्स एउटा रहेको छ । सबैभन्दा कम खराब कर्जा अनुपात आईसिएफसि फाइनान्सको ०.५४ प्रतिशत रहेको छ । श्री इन्भेष्ट एण्ड फाइनान्स, गुहेश्वरी मर्चेन्ट बैंकिङ्ग एण्ड फाइनान्स, र मल्टिपपर्स फाइनान्सको खराब कर्जा १ प्रतिशतभन्दा कम छ । पोखरा फाइनान्सको खराब कर्जा अनुपात १.३७ प्रतिशत रहेको छ ।

जानकी फाइनान्सको खराब कर्जा सर्वाधिक बढ्यो

गत आवमा अघिल्लो आवको तुलनामा जानकी फाइनान्सको खराब कर्जा सर्वाधिक ५.३२ प्रतिशत बढेको छ । अघिल्लो आवमा २.५१ प्रतिशत रहेको फाइनान्सको खराब कर्जा ७.८३ प्रतिशत पुगेको हो ।

यसैगरी समीक्षा अवधिमा गोर्खाज फाइनान्सको ३.८७ प्रतिशत, सेन्ट्रल फाइनान्स ०.८०, गुहेश्वरी मर्चेन्ट ०.४४ प्रतिशत र पोखरा फाइनान्सको खराब कर्जा ०.३३ प्रतिशत बढेको छ ।

यस अवधिमा नेपाल फाइनान्सको ३०.७५ प्रतिशत, बेष्ट फाइनान्स १०.४९, रिलायन्स फाइनान्स १.८३, आईसिएफसि फाइनान्स १.११, गुडविल फाइनान्स ०.९१, प्रोगेशिभ फाइनान्स ०.६८, समृद्धि फाइनान्स ०.५२, प्रतिशत, मञ्जुश्री फाइनान्स ०.१५, मल्टिपपर्स फाइनान्स ०.११ र श्री इन्भेष्ट एण्ड फाइनान्स कम्पनीको खराब कर्जा अनुपात अघिल्लो आवको तुलनामा ०.०२ प्रतिशत बिन्दुले घटेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।