हुलास ब्रान्डका खाद्य सामाग्री उत्पादक भुदियो खाद्य उद्योगको आम्दानी बढ्यो

हुलास ब्रान्डको नामबाट विभिन्न खाद्य सामाग्रीहरुको उत्पादन तथा बिक्री वितरण गर्दै आएको भुदियो खाद्य उद्योगको आम्दानीमा सन् २०२२ मा सामान्य वृद्धि भएको छ ।

सन् २०२१ मा ८ करोड २६ लाख आम्दानी गरेको भुदियो खाद्य उद्योगले सन् २०२२मा ९ करोड २२ लाख आम्दानी गरेको छ । गत वर्षको तुलनामा यो वर्षको सञ्चालन आम्दानी ११.६२ प्रतिशतले वृद्धि भएको छ ।

हुलास ब्रान्डनामबाट कम्पनीले सूजी, चामल, आटा, जीरा र विभिन्न दालहरुको बिक्री वितरण गर्दै आएको छ । नेपाली भान्साका लागि अत्यावश्यक पर्ने सामाग्रीहरुको उत्पादन गरिरहेको भुदियो खाद्य उद्योगका सामाग्रीहरुको माग बजारमा यथावत नै रहेका कारण कम्पनीको आम्दानीमा वृद्धि भएको द्ध ।

सन् २००१ मा स्थापना भएको कम्पनीमा गोल्छा ग्रुपका लाक्मान्य गोल्छाको स्वामित्व रहेको छ । गोल्छा ग्रुप कम्पनीको प्रमोटर रहेको छ । लाक्मान्य गोल्छा नै कम्पनीका अध्यक्ष रहेका छन् ।

सीमा नाका देखि निकट सिराहाको लालबन्दीमा उद्योग अवस्थित रहेका कारण कम्पनीलाई कच्चा पदार्थको आयात र ढुवानीमा सहजता भएको छ । उद्योगको उत्पादन क्षमता १९ हजार ८०० मेट्रिक टन प्रतिवर्ष रहेको छ ।

चामल, गहुँ तथा दालको उत्पादन बाह्र महिना नहुने हुँदा कम्पनी इन्भेन्टोरीमा निर्भर रहेको छ । मौसमी उत्पादनका कारण कच्चा पदार्थको मूल्यमा भिन्नता आउने गरेको छ । त्यस्तै खाद्य उद्योगहरुबीचको बढ्दो प्रतिस्पर्धा, कच्चा पदार्थको मूल्यमा भएको वृद्धि, बैंक तथा वित्तीय संस्थाहरुले ब्याजदर बढाउँदा त्यसको प्रभाव कम्पनीको आम्दानीमा परेको छ ।

एक अर्ब ६० करोड अल्पकालीन तथा दीर्घकालीन कर्जाका लागि कम्पनीले रेटिङ गराएको छ । रेटिङ एजेन्सी केयरएज नेपालले दीर्घकालीन कर्जाका लागि बी प्लस र अल्पकालीन कर्जाका लागि ए४ रेटिङ गरेको छ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।