यातायात कार्यालयका शाखा अधिकृतको एक करोड अकुत सम्पत्ति

अख्तियार दुरुपयोग अनुसन्धान आयोगले यातायात व्यवस्था कार्यालय सवारीचालक अनुमतिपत्र सुकेधारा चावहिलका तत्कालीन निमित्त कार्यालय प्रमुख शाखा अधिकृत गणेशप्रसाद पोखरेलविरुद्ध विशेष अदालतमा भष्ट्रचारको मुद्दा दर्ता गरेको छ ।

पोखरेलले एक करोड ६ लाख ३३ हजार अकुत सम्पत्ति आर्जन गरेको अभियोगमा अख्तियारले शुक्रबार विशेष अदालतमा मुद्दा दर्ता गरेको हो ।

आयोगले पोखरेल सार्वजनिक सेवाको पदमा प्रवेश गरेको २०४६ असारदेखि २०७८ फागुनसम्मको जाँच अवधिमा ३ करोड ३१ लाख ५५ हजार ६२ रूपैंया आय आर्जन गरेको देखिएको र सोही अवधिमा ४ करोड ३७ लाख ८८ हजार ४०२ रूपैंया खर्च तथा लगानी गरेको देखिँदा आयभन्दा वढी १ करोड ६ लाख ३३ हजार ३३९ रूपैंया देखिएको जनाएको छ ।

पोखरेलले जाँच अवधिमा आर्जन गरेको श्रोत नखुलेको सम्पत्ति निजको श्रीमती बिमला न्यौपाने पोखरेलको नाममा हाल कायम रहेका सम्पत्तिबाट जफत असुल उपर गरी पाउन आयोगले मागदावी समेत गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।