भारतले निर्यातमा लगाएको प्रतिबन्ध खुकुलो गरेसँगै घट्यो प्याजको मूल्य, किलोमै ६० रुपैयाँको गिरावट

भारतले प्याज आयातमा लगाएको प्रतिबन्ध खुकुलो गरेसँगै मूल्यमा पनि गिरावट आएको छ । भारतको वाणिज्य एवं उद्योग मन्त्रालय अन्तर्गतको विदेश व्यापार महानिर्देशनलायले उत्पादनमा कमी आएको भन्दै मंसिर २१ गतेदेखि प्याज निर्यातमा पूर्ण प्रतिबन्ध लगाएको थियो ।

भारतले सन् २०२४ को मार्च ३१ (चैत १८ गते) सम्मका लागि प्याज निर्यातमा रोक लगाउने भनेता पनि अहिले भने व्यापारीहरुले भारतबाट प्याज आयात गरिरहेको आलु प्याज व्यवसायी महासंघका अध्यक्ष प्रकाश गजुरेलले बताए ।

उनले भने, ‘भारतले प्रतिबन्धलाई खुकुलो गरेकोले केही मात्रामा प्याज आयात भइरहेको छ ।’ यद्यपी सरकारसँग भ्याटको विषयमा भने वार्ता नभएको भन्दै अध्यक्ष गजुरेलले आफुहरुले भारतबाट नभई तराईबाट प्याज आयात गर्ने गरेको बताए ।

अध्यक्ष गजुरेलले नोटबजारसँग भने,‘ खुल्ला सिमाना भएकोले गर्दा तराईका व्यापारीले भारतबाट प्याज ल्याउनु हुन्छ हामी तराईबाट ल्याउँछौँ ।’ उनका अनुसार भारतको प्रतिवन्ध पछि व्यापारीहरुले चिनियाँ प्याज आयात गर्न थालेपछि यसको मूल्यमा गिरावट आएको हो ।

कालीमाटी फलफूल तथा तरकारी बजारमा आज भारतीय प्याजको भाउ ८० देखि ९० रूपैयाँ तोकिएको छ । प्याजको भाउ पुस २ गते प्रतिकिलो १४५ रुपैयाँ तोकिएको थियो । आइतबार चिनियाँ प्याजको भाउ प्रतिकिलो ८० देखि ८५ रूपैयाँ तोकिएको छ । नेपाली बजारमा प्याजको अभाव भएपछि पुस ७ गतेदेखि मात्र चिनियाँ आयात गर्न थालिएको हो । आइतबार हरियो प्याजको भाउ ९० देखि १०० रूपैयाँ प्रतिकिलो छ ।

कुन तरकारीको मूल्य कति ?

आइतबार नेपाली ठूलो गोलभेडाको भाउ ५० देखि ५५ रूपैयाँ छ । भारतीय ठूलो गोलभेडा प्रतिकिलो ६० देखि ६५ रूपैयाँ तोकिएको छ ।
आइतबार लोकल सानो गोलभेडा १५ देखि १९.५० रुपैयाँसम्म किनबेच भइरहेको छ ।

आइतबार नेपाली रातो आलु प्रतिकिलो ३५ देखि ३७ रूपैयाँ र भारतीय रातो आलु प्रतिकिलो ३० देखि ३२ रूपैयाँ मूल्य तोकिएको छ। सेतो आलुको भाउ २८ देखि २९ रूपैयाँ छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।