गैरआवासीय नेपाली संघ (एनआरएनए) ले सिडिएस एण्ड क्लियरिङ लिमिटेड (सिडिएससी) ले सूचीकृत कम्पनीहरुलाई दोहोरो इन्टरनेसनल सेक्युरिटिज आइडेन्टिफिकेसन नम्बर (आईजिन) दिने गरी निर्देशिकाको मस्यौदा बनाएको भन्दै बिरोध जनाएको छ । संघले सोमबार विज्ञप्ति जारी गर्दै नेपाल धितोपत्र बोर्डमा पेस गरिएको प्रस्तावित निर्देशिकाको मस्यौदाप्रति गम्भीर ध्यानाकर्षण भएको जनाएको हो ।

“सीडीएससीले धितोपत्र बजारमा सेयरको सार्वजनिक निष्कासन गरी सूचीकृत हुने प्रक्रियामा रहेका कम्पनीहरूको संस्थापक समूहको सेयर अभौतिकीकरण प्रक्रियामा संस्थापक र सर्वसाधारण सेयर गरी दुई वटा इन्टरनेसनल सेक्युरिटिज आइडेन्टिफिकेसन नम्बर (आईजिन) को व्यवस्था गर्ने भनेर पेश गरेको भनिएको प्रस्तावले प्रभाव नेपालको पूँजी बजार, लगानी वातावरण, र गैरआवासीय नेपालीको लगानी नेपालमा ल्याउने योजनामा नकारात्मक असर पार्न सक्ने देखिन्छ,” संघले भनेको छ ।

प्रस्तावित निर्देशिका कार्यान्वयनमा आउँदा विदेशमा बसोबास गर्ने नेपाली संस्थापक लगानीकर्तामा भ्रम र निराशा फैलिने, सेयर कारोबारमा अन्योल बढ्ने, तथा दीर्घकालीन रूपमा पूँजी बजारको स्थायित्व र पारदर्शितामा गम्भीर असर पर्नेतर्फ सम्बद्ध निकायहरुको ध्यानाकर्षण समेत गराएको छ ।

स्थापनाकालदेखि नै विदेशमा रहेका नेपालीको ज्ञान, सीप र पूँजीलाई नेपालमा भित्राउने काम भइरहेकोमा त्यसलाई अझ बढी संगठित रुपमा साना तथा मझौला लगानीलाई मुलुकमा आकपर्षत गर्ने संघको उद्धेश्य रहेको विज्ञप्तिमा उल्लेख छ ।

ऊर्जा, पूर्वाधार, पर्यटन, स्टार्टअप तथा वित्तीय क्षेत्रमा गैरआवासीय नेपालीहरूद्वारा उल्लेखनीय लगानी हुने क्रम बढिरहेको र गैरआवासीय नेपालीहरूबाट नेपालमा हुने लगानी अहिलेको आर्थिक सुधार र पूर्वाधार विकासमा महत्वपूर्ण स्रोत रहेकोतर्फ संघले ध्यानाकर्षण गराएको छ । “तर विश्वभरिका गैरआवासीय नेपालीहरुलाई नेपालको विकासमा सहभागी हुन तथा आफ्नो ज्ञान, सीप र पूँजी नेपालमा भित्र्याउन सहज वातावरण निर्माण गर्नुपर्नेमा यस प्रस्तावित निर्देशिकाले लगानीमा ठुलो असर पर्ने यस संघको ठहर छ,” विज्ञप्तिमा भनिएको छ ।

अन्ना भन्छ ‘कम लागत र सहजताका लागि आईजिन’, सिडिएससी भने झमेलाका चाङ सहितको मस्यौदा लिएर धितोपत्र बोर्डमा (पूर्णपाठ सहित)

गैरआवासीय नेपालीहरूले नेपालमा लगानी गर्दा स्थायित्व, पारदर्शिता, र कानुनी स्पष्टता अपेक्षा गर्ने भन्दै संघले प्रस्तावित व्यवस्था कार्यान्वयन भएमा संस्थापक सेयरधनीहरूलाई सेयर बेच्न समेत कठिनाइ भोग्नुपर्ने, वैदेशिक लगानी फिर्ता गर्न नसकिने परिस्थिति बन्ने, र कानुनी अन्योलको वातावरणले अन्तर्राष्ट्रिय लगानीकर्तामा नकारात्मक सन्देश जाने खतरा रहेकोतर्फ पनि संघले सचेत गराएको छ ।

पूँजी बजारप्रतिको विश्वास लगानी सुरक्षाको प्रत्याभूति र प्रवासी तथा विदेशी लगानीकर्ताको विश्वास कायम राख्नु नेपालको दीर्घकालीन समृद्धिको आधार रहेको भन्दै संघलेसम्बन्धित नियामक निकायहरू, नेपाल धितोपत्र बोड, अर्थ मन्त्रालय, र सिडिएससीलाई यो प्रस्ताव पुनर्विचार गर्न, गम्भीर छलफलमार्फत समग्र प्रभाव मूल्याड्कन गर्न, र सन्तुलित निर्णय लिन आग्रह गरेको छ ।

नेपालमा लगानीमैत्री वातावरणको रक्षा गरि कानुनी तथा प्रणालीगत नीतिहरुले निजी क्षेत्र, प्रवासी नेपाली, र वैदेशिक लगानीकर्तामा आशावादी सन्देश दिन पनि संघले आग्रह गरेको छ ।