नेप्से ५ दिनमा ७० अंकले बढ्यो, बुधबार मात्रै साढे २ अर्ब बढीको कारोबार

कोरोना भाइरसको संक्रमण नियन्त्रणका लागि देशका विभिन्न जिल्लाहरुमा निषेधाज्ञा जारी भएपनि शेयर बजार भने सुधारको लयमा देखिएको छ ।

निषेधाज्ञा जारी भएपछिको ५ कारोबार दिनमै नेप्से सूचक ७० अंक माथि उकालो लागेको छ भने कारोबार रकममा समेत सुधार आइरहेको छ । गत साताको अन्तिम दिन बिहीबारदेखि लगातार बढेको नेप्से यो साताको बुधबारसम्म आइपुग्दा निरन्तर उकालो लागेको छ ।

निषेधाज्ञाकै अवस्थामा अनलाइनका माध्यवाट घरबाटै शेयर कारोबार गर्ने अवस्था आएपछि बजारमा सकारात्मक प्रभाव परेको देखिन्छ । साथै केहि समय अगाडि निष्कासन भएका प्राथमिक शेयरहरु दोस्रो बजारमा किनबेच हुन थालेपछि पनि कारोबारीहरुको संख्या बढ्न थालेको छ ।

अनलाइन मार्फत धेरै संख्यामा कारोबार हुन थालेपछि कारोबार संख्या, शेयर कित्ता तथा रकममा समेत सुधार आइरहेको छ।

बैंक तथा वित्तीय संस्थाहरुमा प्रशस्त तरलता रहेको र ब्याजदर समेत घटेको अवस्थामा पूँजी बजारमा सकारात्मक प्रभाव परेको देखिन्छ ।

पछिल्लो समयमा बैंकहरुमा निक्षेप थुप्रिएको अवस्था छ भने लगानी गर्ने अवसर पाउन सकेका छैनन् । बैंकमा सस्तो दरमा रहेको निक्षेप लगानीका अन्य अवसरहरु नभएपछि शेयर बजारमा आएको हुनाले पनि बजार वढेको अनुमान विश्लेषकहरुको छ ।

निषेधाज्ञापछि नेप्सेमा ५ दिन कारोबार भएको छ । यो चार दिनमा नेप्से परिसूचक निरन्तर वढेको छ । नेप्से सूचक बिहीबार ६, आइतबार १२, सोमबार २१ , मंगलबार ९ अंंक र बुधबार २२ अंकले वढेको छ । यी कारोबार दिनमा कारोबार रकम पनि २ अर्बसम्म भएको छ । अनलाइन कारोबारमा लगानीकर्ता अभ्यस्त भएपछि बजारमा सकारात्मक प्रभाव परेको हो ।

बुधबार नेप्से परिसूचक २१.१० अंकले बढेर १४६२.०३ बिन्दुमा पुगेको छ । नेप्सेमा १८६ कम्पनीको ५८ लाख ८२ हजार १०१ कित्ता शेयर २ अर्ब ६५ करोड ६१ लाख रुपैयाँ बराबरमा किनबेच भएको छ ।

कारोबार रकम अघिल्लो दिनको तुलनामा भन्दा ८० करोड बढी हो । मंगलबार १ अर्ब ८५ करोड बराबरको शेयर किनबेच भएको थियो । बुधबार कारोबारमा आएका व्यापार र जीवन बीमाकम्पनी बाहेक सबै समूहको सूचक सकारात्मक रहेका छन् ।

यस्ता छन् कमाउने कम्पनी

यस्ता छन् गुमाउने कम्पनी

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।