नेप्से लगातार तेस्रो दिन घट्यो, हाइड्रोको शेयर बढेपछि आईपीओमा घाटा ब्यहोरेकाले पाए राहत

शेयर बजार सूचक मापक नेप्से लगातार तेस्रो दिन घटेको छ । सोमबार ४.७२ अंकले घटेको नेप्से मंगलबार बढेर ७.२१ र बुधबार ३.१९ गरी कूल १५.१२ अंकले ओरालो लागेको हो ।

नेप्से सूचक घटेपनि पछिल्ला दिनमा आईपीओको आधासम्म मूल्य झरेका १८ कम्पनीको शेयरमध्ये नेशनल हाइड्रोपावर बाहेक सबै कम्पनीको शेयरमूल्य एक सय रुपैयाँ माथि पुगेको छ । नेशनल हाइड्रोपावरको भने ८ रुपैयाँ बढेर ९८ रुपैयाँ पुगेको छ । यससँगै लामो समयदेखि आईपीओ भरेर घाटा खान बाध्य लगानीकर्तालाई मूल्य बढेसँगै राहत सहशुस भएको छ ।

विश्व महामारीका कारण अधिकांश क्षेत्रको ब्यापार व्यवसाय प्रभावित बनिरहेको समयमा हाइड्रोपावर कम्पनीको सस्ता शेयरमा लगानीकर्ता आकर्षित बनेका हुन् । जसले शेयरमूल्य बढ्ने अधिकांश कम्पनी यसै उपसमूहका रहेका छन् ।

बुधबार कारोबार रकम १२ करोड ३८ लाख रुपैयाँले बढेर १ अर्ब ९५ करोड ३६ लाख रुपैयाँ पुगेको छ । मंगलबार १ अर्ब ८२ करोड ९८ लाख रुपैयाँको शेयर कारोबार भएको थियो ।

आज कुल १९० कम्पनी ८० लाख १९ हजार ६६१ कित्ता शेयर ३६ हजार १८१ पटक खरीद बिक्री भएको छ । कारोबारमा आएका चार उपसमूहका सूचक सकारात्मक बनेको बजारमा ८ वटा उपसमूहको सूचक ऋणात्मक रहेको छ । विकास बैंक र म्युचुअल फण्डको सूचक १ प्रतिशत धेरैले बढेको छ भने वित्त र जलविद्युतको सूचक पनि आज बढेका छन् । आज ब्यापार उपसमूहको सूचक १ प्रतिशत धेरैले घटेको छ ।

बजार खुलेदेखि नै ओरालो गति समातेको नेप्से बजार १ बजेसम्ममा १ हजार ५४२ दशमलव ९० अंकसम्म झरेकोमा त्यसपछि पुनः गति समातेको थियो । दिउँसो २ः२२ बजे १५५४.२८ अंकसम्म पुगेको बजार पुन केही करेक्शन आएर १ हजार ५५० दशमलव ४३ अंकमा बन्द भएको छ ।

जलविद्युत कम्पनीको शेयरको माग बढ्यो

बुधबार नेप्से सूचक घटेपनि अधिकांश कम्पनीको शेयरमूल्य बढेको छ । कामना सेवा विकास बैंकको सबैभन्दा १० प्रतिशतले बढेको बजारमा जोशी हाइड्रोपावर कम्पनीके पनि सर्किट मूल्यमा कारोबार भएको छ ।

यसैगरी घलेम्दी, आँखुखोला, युनियन, पञ्चकन्या माइ हाइड्रोपावर, खानीखोला, दीब्यश्वरी, कर्णाली डेभलपमेन्ट बैंक, र हिमाल दोलखा हाइड्रोपावर कम्पनीको शेयरमूल्य ९ प्रतिशतभन्दा धेरैले बढेर कारोबार भएको छ ।

नेपाल फाइनान्सको शेयरमूल्य धेरै घट्यो

आजको बजारमा नेपाल फाइनान्सको शेयरमूल्य सबैभन्दा धेरै ६.८७ प्रतिशतले घटेर २४४ रुपैयाँमा झरेको छ । ङादी ग्रुप पावरको ३.२४ प्रतिशतले शेयरमूल्य घटेको बजारमा पाँचथर पावर, युनाइटेड फाइनान्स, रैराङ हाइड्रोपावर, लक्ष्मी लघुवित्त वित्तीय संस्था, राष्ट्रिय बीमा कम्पनी र नेपाल सेवा लघुवित्तको शेयरमा लगानी गरेका लगानीकर्ताले २ प्रतिशत धेरैले गुमाएका छन् ।

नेपाल रि-इन्स्योरेन्सको उच्च कारोबार

आजको बजारमा नेपाल रि इन्स्योरेन्सको सबैभन्दा धेरै ११ करोड २४ लाख ३५ हजार रुपैयाँको शेयर कारोबार भएको छ ।

यसैगरी अरुण काबेली पावरको ९ करोड ७८ लाख, नेशनल हाइड्रोपावरको ९ करोड २१ लाख, हिमाल दोलखा हाइड्रोपावरको ८ करोड २९ लाख, अपि पावर कम्पनीको ७ करोड ४८ लाख, अरुण भ्याली हाइड्रोपावरको ६ करोड ६२ लाख, र नेपाल बैंकको ५ करोड २० लाख रुपैयाँको शेयर कारोबार भएको छ ।

यसैगरी कामना सेवा विकास बैंक, एनएमबि बैंक, र नेपाल लाइफको पनि उच्च कारोबार हुँदै शीर्ष दश कम्पनीभित्र समेटिएका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।