दशैंलाई शुभकामना बाँड्दै बन्द भयो शेयर बजार, २ अर्बको कारोबार

नेपालीहरुको ठूलो चाड बडा दशैंलाई हरियो रंगले स्वागत गर्दै साताको अन्तिम कारोबार दिन बिहीबारको बजार बन्द भएको छ । शेयर खरीदको रकम भुक्तानी दशैंपछि गर्दा हुने भएपछि लगानीकर्ताले दशैंका लागि शेयर बजारमा लगानी बढाएका हुन् ।

वित्तीय क्षेत्रमा रहेको अधिक तरलता र बैंकहरुमा सुरु भएको लाभांश सिजनले पनि लगानीकर्ताहरुको शेयर बजारमा लगानीगर्ने मनोबल बढ्दो छ । कोरोना महामारीका बीचमा पनि लाभांश घोषणा गरेका सबै बैंकहरुले लगानीकर्तालाई १० प्रतिशतभन्दा धेरै लाभांश वितरण गरेका छन् । बैंक ब्याजदर घटेर न्यून बिन्दुमा झरेकाले पनि शेयर बजार तल आउने अवस्था छैन । यहि कारणले पनि शेयर बजारमा लगानी भित्रिरहेको छ ।

बिहीबार नेप्से सूचक ८.५४ अंकले बढेर १ हजार ६०६.२५ अंकमा पुगेको छ । १८७ कम्पनीका ६४ लाख ५७ हजार ८३३ कित्ता शेयर ३० हजार ३२८ पटक खरीदबिक्री हुँदा कारोबार रकम १ अर्ब ९९ करोड ४५ लाख ४४ हजार रुपैयाँ पुगेको छ ।
कारोबारमा आएका १२ उपसमूहका सूचकमध्ये ८ वटा उकालो लागेका छन् भने ४ वटा सूचक ऋणात्मक भएका छन् ।

• कुमारी बैंककेका उच्च कारोबार

बुधबार लाभांश घोषणा गरेको कुमारी बैंकको आज सबैभन्दा धेरै शेयर कारोबार भएको छ । बैंकको ५ लाख ९५ हजार ८७१ कित्ता शेयर १४ करोड १५ लाख ४५ हजार रुपैयाँमा बिनबेच भएको छ । बैंकले बुधबार गत आवको मुनाफाबाट १० प्रतिशत बोनस र ४ प्रतिशत नगद लाभांश घोषणा गरेको थियो ।

कारोबार रकमका आधारमा दोस्रो स्थानमा रहेको एनआईसी एशिया बैंकको पनि करिब १० करोड रुपैयाँको शेयर कारोबार भएको छ । अपि पावर, प्राइम कमर्सियल बैंक, र ग्लोबल आईएमई बैंकको ७ करोडभन्दा माथिको शेयर कारोबार भएको छ ।

• जनरल इन्स्योरेन्सको शेयरमूल्यमा सातौं दिन सर्किट, नेपाल फाइनान्स पनि पच्छाउँदै

जनरल इन्स्यनेरेन्सको शेयरमूल्यमा आज सातौं दिन पनि सकारात्मक सर्किट लागेको छ । भर्खरै कारोबारमा आएको कम्पनीको शेयरमूल्यमा कारोबार खुलेयता २८४ रुपैयाँको वृद्धि भैसकेको छ ।  बिहीबार मात्रै कम्पनीको शेयरमूल्य ५३ रुपैयाँले बढेको हो ।

अघिल्ला दिनहरुको तुलनामा बुधबार र बिहीबार कम्पनीको शेयरमा धेरै कारोबार बिक्री चाप देखिएको छ । बुधबार ४५ हजार कित्ता कारोबारमा आएकोमा बिहीबार भने कम्पनीको ८१ हजार ६२६ कित्ता शेयर ४ करोड ८० लाख ५५ हजार रुपैयाँमा किनबेच भएको छ ।

यसैगरी आजको बजारमा १२५ प्रतिशत हकप्रदमा शेयरमुल्य समायोजन भएको नेपाल फाइनान्सको शेयरमूल्यमा पनि सकारात्मक सर्किट लागेर प्रतिकित्ता शेयरमूल्य २०८ रुपैयाँ पुगेको छ ।

यसैगरी अपि पावर, सेञ्चुरी कमर्सियल बैंक, प्राइम कमर्सियल बैंक, सेन्ट्रल फाइनान्स, प्रोगेशिभ फाइनान्स, विजय लघुवित्त, गुहेश्वरी मर्चेन्ट, र बेष्ट फाइनान्स शीर्ष शेयरमूल्य बढ्ने दश कम्पनीको सूचीमा छन् ।

• माउन्टेड हाइड्रो र रैराङका लगानीकर्ताले गुमाए

आजको बजारमा माउन्टेड र रैराङ हाइड्रोपावरको शेयरमा लगानी गरेका लगानीकर्ताले सबैभन्दा धेरै गुमाएका छन् । दुबै कम्पनीको शेयरमूल्यमा ३ प्रतिशत धेरै गिरावट आएको छ ।

धेरै शेयरमूल्य घट्ने दश कम्पनीको सूचीमा नेपाल हाइड्रो डेभलोपर कम्पनी, पञ्चकन्या माई, सप्तकोशी डेभलपमेन्ट बैंक, राधी विद्युत कम्पनी, गुराँस लाइफ इन्स्योरेन्स, कालिका पावर, युनिभर्सल पावर र हिमाल दोलखा हाइड्रोपावर रहेका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।