मुक्तिनाथ विकास बैंकको खुद नाफा साढे ६१ करोड, लाभांश क्षमता ११ प्रतिशत

मुक्तिनाथ विकास बैंक लिमिटेड (MNBBL) ले चालु आर्थिक वर्षको दोस्रो त्रैमाससम्ममा ६१ करोड ५५ लाख ७४ हजार रुपैयाँ खुद नाफा कमाएको अपरिष्कृत वित्तीय विवरण सार्वजनिक गरेको छ ।

विकास बैंकहरुमध्ये अधिकांश सूचकहरुमा एक नम्बर रहँदै आएको बैंकले गत आर्थिक वर्षको यसै अवधिमा ४७ करोड २५ लाख रुपैयाँ खुद नाफा कमाएकोमा ३०.२८ प्रतिशतले नाफा वृद्धि गरेको हो ।

चालु आवको ६ महिना अवधिमा बैंकको वितरणयोग्य नाफा ५५ करोड ५५ लाख १० हजार रुपैयाँ रहेको छ । बैंकको दोस्रो त्रैमाससम्म आर्जन नाफाका आधारमा यसबाट बैंकले शेयरधनीलाई १०.९५ प्रतिशत लाभांश वितरण गर्ने क्षमता राख्दछ ।

चुक्ता पूँजी ४ अर्ब ८१ करोड १५ लाख ५१ हजार रुपैयाँ रहेको बैंकको नाफा वृद्धिसँगै प्रतिशेयर आम्दानी ३.७४ रुपैयाँले बढेर वार्षिक २५.५९ रुपैयाँ पुगेको छ ।

• तपाईको शेयर भएको कम्पनीको शेयर सम्बन्धि सबै काम कहाँबाट हुन्छ ? सूची हेर्नुहोस्

पुस मसान्तसम्म बैंकले ७४ अर्ब ८७ करोड २२ लाख ४७ हजार रुपैयाँ निक्षेप संकलन गरी ५८ अर्ब २७ करोड ४० लाख ४१ हजार रुपैयाँ कर्जा लगानी गरेको छ । यसबाट बैंकले १ अर्ब १६ करोड २४ लाख ३९ हजार रुपैयाँ खुद ब्याज आम्दानी गरेको गरेको छ ।

बैंकको जगेडा कोषमा ९३ लाख ३० हजार रुपैयाँ र शेयरधनी कोषमा ५३ करोड २६ लाख रुपैयाँ सञ्चित छ । यस अवधिमा बैंकको प्रतिशेयर नेटवर्थ १३०.४६ रुपैयाँ, पूँजीकोष अनुपात ११.८९ प्रतिशत, निष्क्रिय कर्जा अनुपात ०.३० प्रतिशत, आधार दर ८.३८ प्रतिशत र स्प्रेडदर ४. ९९ प्रतिशत र मूल्य आम्दानी अनुपात १४.७३ गुणा छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।