उच्च बिन्दुमा पुगेको बजारमा नाफा बुकिङ्गको होडले कारोबारमा रेकर्ड, नेप्से भने दोहोरो अंकले घट्यो

बजारले ऐतिहासिक उचाई हासिल गरेका बेला उच्च नाफा गर्नेहरु शेयर बिक्री गरेर नाफा बुकिङ्गमा लाग्दा कारोबार रकममा रेकर्ड कायम भएको छ । तर बिक्री चाप पर्दा बजार भने दोहोरो अंकले घटेको छ ।

साताको अन्तिम दिन आज (बिहीबार) शेयर बजार कारोबार मापक नेप्से परिसूचक १६.५५ अंकले घटेर २४२५.२९ मा झरेको छ । नेप्से ०.६८ प्रतिशतले घटेको हो । यस्तै सेन्सेटिभ परिसूचक ४.३२ अंकले घटेर ४४२.०६ मा पुगेको छ । 

कूल २०९ वटा कम्पनीको २ करोड २१ लाख ५३ हजार ९ सय ८१ कित्ता शेयर खरिदबिक्री हुँदा ९ अर्ब ८९ करोड ८४ लाख ५६ हजार १२८ रुपैयाँको कारोबार भएको छ । यो कारोबार हालसम्मकै उच्च हो । यसअघि सर्वाधिक कारोबार रकम ९ अर्ब ३७ करोड रुपैयाँ रहेको थियो।

बिहीबार कारोबार भएका कूल १२ उपसमूहमध्ये ३ वटा उपसमूहको सूचक बढेको छ भने बाँकी ९ वटा उपसमूहको घटेको छ । निर्जीवन बीमा समुहको सूचक ४१० अंकले बढ्दा उत्पादन समुह १६७ र लघुवित्त समुह ८७ अंकले बढेको छ। अन्य सबै उपसमुहको सूचक घटेको छ।

यसदिन पनि नेपाल लाइफ इन्स्योरेन्स कम्पनीको सबैभन्दा धेरै ५७ करोड ८८ लाख रूपैयाँ बराबरको शेयर कारोबार भएको छ ।

सुर्योदय लघुवित्त, सगरमाथा इन्स्योरेन्स, सपोर्ट माइक्रोफाइनान्स, प्रभु लाइफ, आरम्भ चौतारी लघुवित्त र सारथी नेपाल लघुवित्तको शेयर मूल्य उच्चदरले बढेको छ। हिमालयन पावर पार्टनर, गुडविल फाइनान्स, मिथिला लघुवित्त तथा गुराँश लघुवित्तको लगायतको शेयर मूल्य धेरै घटेको छ ।

अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।