निर्जीवन बीमा कम्पनीहरुद्धारा ६ अर्ब ४० करोडको व्यवसाय, कसको कति ?

निर्जीवन बीमा कम्पनीले चालु आर्थिक वर्षको २ महिनामा ६ अर्ब ४० करोड रुपैयाँ कुल बीमाशुल्क संकलन गरेका छन् ।

बीमा समितिको तथ्याङ्क अनुसार सञ्चालनमा रहेका २० निर्जीवन बीमा कम्पनीहरुले दुई महिना अवधिमा ४ लाख ७३ हजार २६४ वटा बीमालेख जारी गरी उक्त रकम (६ अर्ब ४० करोड) संकलन गरेका हुन् । भदौ महिनामा मात्रै कम्पनीहरुले २ अर्ब ९६ करोडको व्यवसाय गरेका हुन् ।

यस अवधिमा शिखर इन्स्योरेन्सले सबैभन्दा धेरै ६८ करोड बीमाशुल्क संकलन गरेको छ । सगरमाथा इन्स्योरेन्स र नेको इन्सयोरेन्सले पनि ५० करोडभन्दा धेरै बीमाशुल्क संकलन गरेका छन् ।

सिद्धार्थ इन्स्योरेन्स, प्रिमियर, एनएलजी, र राष्ट्रिय बीमा कम्पनीले ४० करोडभन्दा धेरै बीमाशुल्क संकलन गर्दा हिमालयन जनरले ३५ करोड रुपैयाँ बीमाशुल्क संकलन गरेको छ ।

बाँकी दश निर्जीवन बीमा कम्पनीले २० करोडदेखि २७ करोडसम्म बीमाशुल्क संकलन गरेका छन् । यस अवधिमा प्रभु र ओरियन्टलले समान २७।२७ करोड, युनाइटेड २६, नेशनल २३, आइएमई जनरल, अजोड र नेपाल इन्स्योरेन्सले समान २२।२२ करोड, लुम्बिनी र एभरेष्ट इन्स्योरेन्सले २१।२१ करोड तथा प्रुडेन्सियल इन्स्योरेन्सले २० करोड बीमाशुल्क संकलन गरेको छ ।

चालु आवको दुई महिना अवधिमा सानिमा जनरलले सबैभन्दा कम १३ करोड बीमाशुल्क संकलन गर्दा दोस्रो कम जनरल इन्स्योरेन्स रहेको छ । जनरल इन्सयोरेन्सले १४ करोड बीमाशुल्क उठाएको छ ।

भदौमा २ अर्ब ९६ करोड संकलन

निर्जीवन बीमा कम्पनीहरुले भदौमा मात्रै २ अर्ब ९६ करोड रुपैयाँ बीमाशुल्क संकलन गरेका छन् । २ लाख २६ हजार १९६ वटा बीमालेख जारी गरेर निर्जीवन बीमा कम्पनीहरुले भदौमा उक्त रकम बराबरको बीमाशुल्क संकलन गरेका हुन् ।

शिखरले भदौमा मात्रै ३६ करोड बीमाशुल्क संकलन गरेको छ । भदौमा नेकोले दोस्रो ठूलो २६ करोड बीमाशुल्क उठाएको छ भने २४ करोड सहित सगरमाथा तेस्रो स्थानमा रहेको छ ।

सिद्धार्थ र एनएलजीले समान २०।२० करोड बीमाशुल्क उठाउँदा आइएमई जनरल, प्रुडेन्सियल, सानिमा जनरल र जनरल इन्सयोरेन्सले भदौ महनिामा १० करोडभन्दा कम बीमाशुल्क संकलन गरेका हुन् ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।