जगदम्बा स्टिल्सले प्रिमियममा सहित पाँच कम्पनीले मागे आईपीओ बेच्न स्वीकृति

सर्वसाधारणमा प्राथमिक सार्वजनिक निष्कासन (आईपीओ) बिक्री गर्न पछिल्लो पटक दुई सातायता पाँच कम्पनीले नेपाल धितोपत्र बोर्ड (सेबोन) मा आवेदन दिएका छन् । पाँच कम्पनीले कुल ५ करोड २३ लाख ९३ हजार ७८ कित्ता सेयर बिक्रीको अनुमति मागेका हुन् ।

बोर्डका अनुसार याम्बालिङ हाइड्रोपावर, एपेक्स हस्पिटालिटी, माविलुङ इनर्जी, जगदम्बा स्टिल्स र एसवाई प्यानल नेपालले आइपीओ निष्कासनको अनुमति मागेका हुन् । जगदम्बा स्टीलले प्रिमियम मूल्यमा सेयर बिक्रीको अनुमति माग गरेको हो भने अन्य चार कम्पनीले अंकित मूल्यमा नै सेयर जारी गर्ने अनुमति मागेका छन् ।

धितोपत्र बोर्डका अनुसार जगदम्बा स्टीलले ६ अर्ब २ करोड १० लाख रुपैयाँ बराबरको आईपीओ बिक्रीका लागि असोज १७ गते अनुमति मागेको छ । कम्पनीले अंकित मूल्य १०० रुपैयाँमा २०० रुपैयाँ प्रिमियम थप गरी प्रतिकित्ता ३०० रुपैयाँका दरले २ करोड ७० हजार कित्ता सेयर बिक्री गर्न अनुमति मागेको हो । धितोपत्र जारी गर्न कम्पनीले सिद्धार्थ क्यापिटल लिमिटेडलाई सेयर निष्कासन तथा बिक्री प्रबन्धक चयन गरेको छ । रेटिङ एजेन्सी इन्फोमेरिक्स क्रेडिट रेटिङ नेपाल लिमिटेडका अनुसार जगदम्बा स्टिल्स लिमिटेडले सन् २०२३ मा ४० अर्ब १७ करोड २० लाख रुपैयाँ बराबरको व्यापार गरेको छ ।

यसैगरी एसवाई प्यानलले नेपाल लिमिटेडले ५२ लाख ३२ हजार ५४८ कित्ता सेयर बिक्री गर्न बोर्डसँग अनुमति मागेको छ । कम्पनीले असोज १९ गते बोर्डमा निवेदन दिएको हो । कम्पनीले १०० रुपैयाँ अंकित दरमा ५२ करोड ३२ लाख ५४ हजार ८०० रुपैयाँ बराबरको आईपीओ बेच्न नुमति मागेको हो । एसवाई प्यानलले धितोपत्र जारी गर्न प्रभु क्यापिटल लिमिटेडलाई सेयर निष्कासन तथा बिक्री प्रबन्धक चयन गरेको छ ।

यस्तै याम्बालिङ हाइड्रोपावर लिमिटेडले पनि आईपीओ जारी गर्न असोज १० गते बोर्डमा निवेदन दिएको छ ।कम्पनीले १०० रुपैयाँ अंकित दरमा २८ करोड रुपैयाँ बराबरको २८ लाख कित्ता सेयर बिक्री गर्न अनुमति मागेको हो । धितोपत्र जारी गर्न हाइड्रोपावरले मुक्तिनाथ क्यापिटल लिमिटेडलाई सेयर निष्कासन तथा बिक्री प्रबन्धक चयन गरेको छ ।

त्यसैगरी, एपेक्स हस्पिटालिटी लिमिटेडले पनि २४ करोड रुपैयाँ बराबरको सेयर सर्वसाधारणमा जारी गर्ने भएको छ ।कम्पनीले १०० रुपैयाँका दरले २४ लाख कित्ता सेयर निष्कासन गर्न असोज १२ गते धितोपत्र बोर्डसँग अनुमति मागेको छ । धितोपत्र जारी गर्न कम्पनीले हिमालयन क्यापिटल लिमिटेडलाई निष्कासन तथा बिक्री प्रबन्धकको नियुक्त गरेको छ ।

यता, माविलुङ इनर्जी लिमिटेडले पनि असोज १४ गते १८ करोड ९० लाख ५३ हजार रुपैयाँको आईपीओ बिक्रीको अनुमति माग्दै धितोपत्र बोर्डमा निवेदन दिएको छ । यो कम्पनीले पनि १०० रुपैयाँका दरले १८ लाख ९० हजार ५३० कित्ता सेयर बिक्री गर्न अनुमति मागेको हो । धितोपत्र जारी गर्न कम्पनीले लक्ष्मी क्यापिटल मार्केटसलाई बिक्री प्रबन्धक तोकेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।