अबु धाबीको ग्लोबल मिडियामा नेपाली टेलिभिजनकर्मी फूर्वा शेर्पा

टेलिभिजनकर्मी तथा निर्देशक फूर्वा शेर्पाले हालै अबुधाबीमा सम्पन्न ग्लोबल मिडिया कांग्रेसमा नेपालको प्रतिनिधित्व गरेका छन्। तीन दिने उक्त कार्यक्रममा विश्वका विभिन्द देशका शिक्षाविद्, युवा तथा विश्वविद्यालयका विद्यार्थीहरूसहित विश्वका केही शीर्ष उद्योगपतिहरू, विशेषज्ञहरू र विशिष्ट व्यक्तित्वहरूको सहभागिता रहेको थियो ।

‘सेपिङ द फ्युचर अफ द मिडिया इन्डस्ट्री’ भन्ने नाराका साथ यो वर्षको ग्लोबल मिडिया कांग्रेसले विश्वव्यापी सरोकारहरूसँग मिल्दोजुल्दो महत्वपूर्ण विषयवस्तुहरूलाई सम्बोधन गरेको थियो । ‘यो अद्भुत अवसर थियो र यस्तो अवसरमा प्रतिनिधिको रूपमा कार्यक्रममा भाग लिन निमन्त्रणा पाउँदा मैले आफूलाई भाग्यशाली ठानेको छु, काठमाडौं फर्किएपछि शेर्पाले कलाकर्मीसंग भनेका छन् ।

यो कार्यक्रम करिव १३ हजार प्रतिनिधि तथा २३ हजारभन्दा बढीको सहभागिहरुका साथ एक प्रभावशाली र गर्विलो आयाम बन्न सफल भएको शेर्पालले अनुभव गरेका छन् । ग्लोबल मिडिया कांग्रेसमा २५७ ब्राण्डहरू प्रदर्शन गरिएको थियो । १७२ देशबाट सहभागिता जनाइयो र १६० जना विश्वव्यापी रूपमा प्रसिद्ध वक्ताहरूको विचार प्रस्तुत गरिएको थियो । कार्यक्रममा सात मुख्य विशेष क्षेत्रहरू थिए, जसले यो अवसरको समग्र भव्यतामा थप योगदान पुर्‍याएको थियो ।

‘मलाई के कुराले अझ बढी छोयो भने यो एउटा यस्तो विस्तृत कार्यक्रम थियो, जसमा ३६ मुख्य सत्रहरू थिए, जसले विषयहरूको विस्तृत दायरालाई समावेश गरेको थियो, शेर्पा भन्छन्– ‘ती सत्रहरूले दिगोपन, नवप्रवर्तन, अत्याधुनिक सञ्चार प्रविधिहरू, खेलकुद मिडिया, युवा संलग्नता र सञ्चार उद्योगको समग्र भविष्यलाई आकार दिन प्रशिक्षण र विकासको निर्णायक भूमिका जस्ता विविध विषयहरू समेटेका थिए । यो एउटा प्रतिबद्धता जनाइए अनुसार नै गहिरो अनुसन्धान र अन्वेषणद्वारा उपलब्ध गराइएका प्रभावशाली तथ्याङ्कहरूलाई समेत उछिनेर साँच्चै विशाल भेला जस्तो महसुस भयो ।’

अझ, यस ग्लोबल मिडिया कांग्रेसले शिक्षा, सह–उत्पादन, इनोभेसन स्टेज, उच्च प्रविधि र भविष्यको मिडिया ल्याबसहित धेरै प्लेटफर्महरू प्रस्तुत गर्यो, जुन सबै मिडिया लगायत शिक्षा र कृत्रिम बुद्धिमत्ता (एआई) को अभिसरण अनुसन्धान गर्न डिजाइन गरिएको हो । वास्तवमा, ग्लोबल मिडिया कांग्रेस एक पारम्परिक सम्मेलन र व्यापार मेला थियो । सम्मेलन स्थल, अबु धाबी राष्ट्रिय प्रदर्शनी केन्द्रमा एउटा ठूलो सभा हल थियो, जसमा पूर्ण सत्रहरू आयोजना गरियो । त्यससंगै, त्यहाँ एउटा मुख्य प्रदर्शनीस्थल थियो, जहाँ सबै प्रकारका टिभि च्यानलहरू, समाचार एजेन्सीहरू, विद्वानहरुसहित अन्य मिडियासंग सम्बन्धित व्यवसायको प्रदर्शनी गरिएको थियो ।

‘मैले ती सबै निरीक्षण गर्दै कोठाको वरिपरि घुम्नमा र विभिन्न प्रदर्शकहरूसँग परिचय आदान–प्रदान गर्न धेरै समय बिताएँ, शेर्पा भन्छन्– ‘त्यसो गर्दा मैले केही राम्रा मानिसहरूलाई भेटें र केही साँच्चै उपयोगी सम्बन्धहरु समेत बनाउन सफल भएँ ।’ ‘धेरै आकर्षणहरू मध्येमा मेरो लागि एउटा प्रमुख आकर्षण स्काई न्यूज अरेबियाको रुपमा देखियो, किनभने यो मलाई मनपर्ने अरबी समाचार च्यानलहरूमध्ये एक हो, शेर्पा भन्छन्– ‘त्यहाँ तिनीहरूसँग कार्यक्रमको लागि चाहिने एउटा राम्रो मिनी स्टुडियो संगै रोभिङ रिपोर्टरहरू र स्काई न्यूज एकेडेमीसमेत थियो, जुन अरबी भाषा बोल्ने पत्रकारहरूको लागि प्रशिक्षण केन्द्र हो ।’

‘टिभी समाचारहरूमा ‘शारीरिक भाषा र सञ्चार’ सम्बन्धी कार्यशालामा भाग लिन पाउँदा मैले आफूलाई भाग्यशाली ठानेको छु, उनी भन्छन्– ‘त्यहाँ मुख्य प्रदर्शनीस्थलमा एउटा विशेष बक्स जस्तो ठाउँमा बनाएर ‘सम्मेलन भित्र सम्मेलन’ नामको कार्यक्रम गरिएको थियो, जसलाई ‘मिडिया फ्युचर ल्याब्स’ भनिएको थियो । ग्लोबल मिडिया कांग्रेसको उद्घाटन उपराष्ट्रपति, उपप्रधानमन्त्री तथा राष्ट्रपतिको अदालतका अध्यक्ष शेख मन्सुर बिन जायद अल नाह्यानले गरेका थिए ।

सहभागीहरूका लागि विभिन्न स्थानको भ्रमण र विविध गतिविधिहरू आयोजना गरिएको थियो, जसमध्ये एक शेख जायद ग्रान्ड मस्जिदको भ्रमण थियो जुन अबु धाबीको मुख्य आकर्षणहरू मध्ये एक हो । कार्यक्रममा आरटी अरेबिकबाट ठूलो टोलीको उपस्थिति थियो । पश्चिमबाट यूरोन्यूज, फ्रान्स २४, सीएनएन, बीबीसी, नेशनल जोग्राफी आदिको उपस्थिति रहेको थियो । कार्यक्रममा चीनको सीसीटिभी र सिजीटिएनबाट मिडियाको उपस्थिति देखिन्थ्यो ।

समारोहमा भिओरी (भिडियो समाचार एजेन्सी) र सीसीटिभीबीचमा प्रसारण सामग्रीमा साझेदारी गर्ने सहमति भयो । भिओरीका ग्राहकहरूलाई सीसीटिभीका सामग्रीमा पहुँच गर्न अनुमति दिँदै भिओरी एजेन्सी पनि अफ्रिकन युनियन अफ ब्रोडकास्टिङको सदस्य बनेको छ, जुन मिडियाकर्मीको प्रशिक्षणमा प्रतिबद्ध छ ।

‘मिडिया उद्योगमा रुचि राख्ने जो कोहीको लागि भविष्यमा आयोजना हुने यस्तो कार्यक्रमहरूमा भाग लिन म सिफारिस गर्दछु, शेर्पा भन्छन्– ‘कार्यक्रमको निर्बाध कार्यान्वयन सुनिश्चित गर्न अथक परिश्रम गर्ने तथा मेरो उपस्थितिलाई सम्भव तुल्याउनु हुने सबैमा म हार्दिक आभार प्रकट गर्दछु ।’